Génesis 18

¹ וירא אליו יהוה באלוני ממרא והוא ישב פתח האהל כחם היום ² וישא עיניו וירא והנה שלשה אנשים נצבים עליו וירא וירץ לקראתם מפתח האהל וישתחוי ארצה ³ ויאמר אדני אם נא מצאתי חן בעיניכם אל נא תעברו מעל עבדכם ⁴ יקח נא מעט מים ורחצו רגליכם והשעינו תחת העץ ⁵ ואקח פת לחם וסעדו לבבכם ואחר תעברו כי על כן עברתם על עבדכם ויאמרו כן תעשה כאשר דברת ⁶ וימהר אברהם האהלה אל שרה ויאמר מהרי שלש סאים קמח סלת לושי ועשי עגות ⁷ ואל הבקר רץ אברהם ויקח בן בקר רך וטוב ויתן אל הנער וימהר לעשותו . ⁸ ויקח חמאה וחלב ואת בן הבקר אשר עשה ויתן לפניהם והוא עמד עליהם תחת העץ ויאכלו ⁹ ויאמרו אליו איה שרה אשתך ויאמר הנה באהל ¹⁰ ויאמר שוב אשוב אליך כעת חיה והנה בן לשרה אשתך ושרה שמעת פתח האהל והיא אחריו ¹¹ ואברהם ושרה זקנים באים בימים חדל להיות לשרה ארח כנשים ¹² ותצחק שרה בקרבה לאמר אחרי בלתי היתה לי עדנה ואדני זקן ¹³ ויאמר יהוה אל אברהם למה זה צחקה שרה לאמר האף אמנם אלד ואני זקנתי ¹⁴ היפלא מיהוה דבר למועד אשוב אליך כעת חיה ולשרה בן ¹⁵ ותכחש שרה לאמר לא צחקתי כי יראה ויאמר לה כי צחקתי ¹⁶ ויקמו משם האנשים וישקפו על פני סדם ואברהם הלך עמם לשלחם ¹⁷ ויהוה אמר המכסה אני מאברהם את אשר אני עשה ¹⁸ ואברהם היו יהיה לגוי גדול ועצום ונברכו בו כל גויי הארץ ¹⁹ כי ידעתי למען אשר יצוה אברהם את בניו ואת ביתו אחריו ושמרו דרך יהוה לעשות צדקה ומשפט למען הביא יהוה על אברהם את אשר דבר עליו ²⁰ ויאמר יהוה צעקת סדם ועמרה כי רבה וחטאתם כי כבדה מאד ²¹ ארדה נא ואראה הכצעקתה הבאה אלי עשו כלה ואם לא אדעה ²² ויפנו משם האנשים וילכו סדמה ואברהם עודנו עמד לפני יהוה ²³ ויגש אברהם ויאמר האף תספה צדיק עם רשע ²⁴ אולי יש חמשים צדיקם בתוך העיר האף תספה ולא תשא למקום למען חמשים הצדקים אשר בקרבה ²⁵ חלילה לך מעשת . כדבר הזה להמית צדיק עם רשע והיה כצדיק כרשע חלילה לך השפט כל הארץ לא יעשה משפט ²⁶ ויאמר יהוה אם אמצא בסדם חמשים צדיקם בתוך העיר ונשאתי לכל המקום בעבורם ²⁷ ויען אברהם ויאמר הנה נא הואלתי לדבר אל אדני ואנכי עפר ואפר ²⁸ אולי יחסרון חמשים הצדיקם חמשה התשחית בחמשה את כל העיר ויאמר לא אשחית אם אמצא שם ארבעים וחמשה ²⁹ ויסף עוד לדבר אליו ויאמר אליו אולי ימצאון שם ארבעים ויאמר לא אשחית בעבור הארבעים ³⁰ ויאמר אל נא יחר לאדני ואדברה אולי ימצאון שם שלשים ויאמר לא אשחית אם אמצא שם שלשים ³¹ ויאמר הנה נא הואלתי לדבר אל אדני אולי ימצאון שם עשרים ויאמר לא אשחית בעבור העשרים ³² ויאמר אל נא יחר לאדני ואדברה אך הפעם אולי ימצאון שם עשרה ויאמר לא אשחית בעבור העשרה ³³ וילך יהוה כאשר כלה לדבר אל אברהם ואברהם שב למקומו