Génesis 4

¹ והאדם ידע את חוה אשתו ותהר ותלד את קין ותאמר קניתי איש את יהוה ² ותסף ללדת את אחיו את הבל ויהי הבל רעה צאן וקין היה עבד אדמה ³ ויהי מקץ ימים ויבא קין מפרי האדמה מנחה ליהוה ⁴ והבל הביא גם הוא מבכרות צאנו ומחלביהן וישע יהוה אל הבל ואל מנחתו ⁵ ואל קין ואל מנחתו לא שעה ויחר לקין מאד ויפלו פניו ⁶ ויאמר יהוה אל קין למה חרה לך ולמה נפלו פניך ⁷ הלוא אם תטיב שאת ואם לא תטיב לפתח חטאת רבץ ואליך תשוקתו ואתה תמשל בו ⁸ ויאמר קין אל הבל אחיו נלכה השדה ויהי בהיותם בשדה ויקם קין אל הבל אחיו ויהרגהו ⁹ ויאמר יהוה אל קין איה הבל אחיך ויאמר לא ידעתי השמר אחי אנכי ¹⁰ ויאמר מה עשית קול דם אחיך צעק אלי מן האדמה ¹¹ ועתה ארור אתה מן האדמה אשר פצתה את פיה לקחת את דם אחיך מידך ¹² כי תעבד את האדמה לא תוסף תת כחה לך נע ונד תהיה בארץ ¹³ ויאמר קין אל יהוה גדול עוני מנשא ¹⁴ הן גרשת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגני ¹⁵ ויאמר לו יהוה לכן כל הרג קין שבעתים יקם וישם יהוה לקין אות לבלתי הכות אתו כל מצאו ¹⁶ ויצא קין מלפני יהוה וישב בארץ נד קדמת עדן ¹⁷ וידע קין את אשתו ותהר ותלד את חנוך ויהי בנה עיר ויקרא את שם העיר כשם בנו חנוך ¹⁸ ויולד לחנוך את עירד ועירד ילד את מחיאל ומחיאל ילד את מתושאל ומתושאל ילד את למך ¹⁹ ויקח לו למך שתי נשים שם האחת עדה ושם השנית צלה ²⁰ ותלד עדה את יבל הוא היה אבי ישב אהל ומקנה ²¹ ושם אחיו יובל הוא היה אבי כל תפש כנר ועגב ²² וצלה גם היא ילדה את תובל קין לטש כל חרש נחשת וברזל ואחות תובל קין נעמה ²³ ויאמר למך לנשיו עדה וצלה שמען קולי נשי למך האזינה אמרתי כי איש הרגתי לפצעי וילד לחברתי ²⁴ כי שבעתים יקם קין ולמך שבעים ושבעה ²⁵ וידע אדם עוד את אשתו ותלד בן ויקרא את שמו שת כי שת לי אלהים זרע אחר תחת הבל כי הרגו קין ²⁶ ולשת גם הוא ילד בן ויקרא את שמו אנוש אז החל לקרא בשם יהוה