Génesis 50

¹ ויפל יוסף על פני אביו ויבך עליו וישק לו ² ויצו יוסף את עבדיו את הרפאים לחנט את אביו ויחנטו הרפאים את ישראל ³ וימלאו לו ארבעים יום כי כן ימלאו ימי החנטים ויבכו אתו מצרים שבעים יום ⁴ ויעברו ימי בכיתו וידבר יוסף אל בית פרעה לאמר אם נא מצאתי חן בעיניכם דברו נא באזני פרעה לאמר ⁵ אבי השבעני לפני מותו לאמר הנה אנכי מת בקברי אשר כרתי לי בארץ כנען שם תקברני ועתה אעלה נא ואקברה את אבי כאשר השבעני ואשובה ⁶ ויאמר פרעה עלה וקבר את אביך כאשר השבעך ⁷ ויעל יוסף לקבר את אביו ויעלו אתו כל עבדי פרעה זקני ביתו וכל זקני ארץ מצרים ⁸ וכל בית יוסף אחיו ובית אביו רק טפם וצאנם ובקרם עזבו בארץ גשן ⁹ ויעל עמו גם רכב גם פרשים ויהי המחנה כבד מאד ¹⁰ ויבאו עד גרן האטד אשר בעבר הירדן ויספדו שם מספד גדול וכבד מאד ויעש לאביו אבל שבעת ימים ¹¹ וירא יושב הארץ הכנעני את האבל בגרן האטד ויאמרו אבל כבד זה למצרים על כן קרא שמו אבל מצרים אשר בעבר הירדן ¹² ויעשו לו בניו כן כאשר צום ¹³ וישאו אתו בניו ארצה כנען ויקברו אתו במערת שדה המכפלה אשר קנה אברהם את השדה לאחזת קבר מאת עפרון החתי על פני ממרא ¹⁴ וישב יוסף מצרימה הוא ואחיו וכל העלים אתו לקבר את אביו אחרי קברו את אביו ¹⁵ ויראו אחי יוסף כי מת אביהם ויאמרו לא ישטמנו יוסף השב ישיב לנו את כל הרעה אשר גמלנו אתו ¹⁶ ויצוו על יוסף לאמר אביך צוה לפני מותו לאמר ¹⁷ כה תאמרון ליוסף אנה שא נא פשע אחיך וחטאתם כי רעה גמלוך ועתה שא נא לפשע עבדי אלהי אביך ויבך יוסף בדברם אליו ¹⁸ וילכו גם אחיו ויפלו לפניו ויאמרו הננו לך לעבדים ¹⁹ ויאמר אליהם יוסף אל תיראו . התחת אלהים אני ²⁰ ואתם חשבתם עלי רעה והאלהים חשבה לטובה למען עשות כיום הזה להחיות עם רב ²¹ ועתה אל תיראו אנכי אכלכל אתכם ואת טפכם וינחם אתם וידבר אל לבם ²² וישב יוסף במצרים הוא ובית אביו ויחי יוסף מאה ועשר שנים ²³ וירא יוסף לאפרים בנים שלשים גם בני מכיר בן מנשה ילדו . בימי יוסף ²⁴ ויאמר יוסף אל אחיו אנכי מת ואלהים פקד יפקד אתכם והעלה אתכם מן הארץ הזאת אל הארץ אשר נשבע לאברהם ליצחק וליעקב ²⁵ וישבע יוסף את בני ישראל לאמר פקד יפקד אלהים אתכם והעליתם את עצמתי מזה אתכם ²⁶ וימת יוסף בן מאה ועשר שנים ויחנטו אתו ויושם בארן במצרים