Génesis 9

¹ ויברך אלהים את נח ואת בניו ויאמר להם פרו ורבו ומלאו את הארץ ² ומראכם וחתתכם יהיה על כל חית הארץ ועל כל עוף השמים בכל אשר תרמש האדמה ובכל דגי הים בידכם נתתיו ³ כל רמש אשר הוא חי לכם יהיה לאכלה כירק עשב נתתי לכם את הכל ⁴ אך בשר בנפשו דמו לא תאכלו ⁵ ואך את דמכם לנפשתיכם אדרש מיד כל חי אדרשנו מיד האדם מיד איש ואחיו אדרש את נפש האדם ⁶ שפך דם האדם באדם דמו ישפך כי בצלם אלהים עשה את האדם ⁷ ואתם פרו ורבו ושרצו בארץ ורבו בה ⁸ ויאמר אלהים אל נח ואל בניו אתו לאמר ⁹ ואני הנני מקים את בריתי אתכם ואת זרעכם אחריכם ¹⁰ ואת כל נפש החיה אשר אתכם בעוף ובבהמה ובכל חית הארץ אתכם מכל יצאי התבה לכל חית הארץ ¹¹ והקמתי את בריתי אתכם ולא יכרת עוד כל בשר . ממי המבול ולא יהיה עוד המבול להשחית הארץ ¹² ויאמר אלהים זאת אות הברית אשר אני נתן ביני ובינכם ובין כל נפש החיה אשר אתכם לדרת עולם ¹³ את קשתי נתתי בענן והיתה לאות ברית ביני ובין הארץ ¹⁴ והיה בענני ענן על הארץ ונראתה הקשת בענן ¹⁵ וזכרתי את בריתי אשר ביני ובינכם ובין כל נפש החיה אשר אתכם בכל בשר ולא יהיה עוד המים למבול להשחית כל בשר ¹⁶ והיתה הקשת בענן וראיתה לאזכרה ברית עולם בין אלהים ובין כל נפש החיה בכל בשר אשר על הארץ ¹⁷ ויאמר אלהים אל נח זאת אות הברית אשר הקמתי ביני ובין כל בשר אשר על הארץ ¹⁸ ויהיו בני נח היצאים מן התבה שם חם ויפת וחם הוא אבי כנען ¹⁹ שלשה אלה בני נח מאלה נפצה כל הארץ ²⁰ ויחל נח איש האדמה ויטע כרם ²¹ וישת מן היין וישכר ויתגל בתוך אהלו ²² וירא חם אבי כנען את ערות אביו ויגד לשני אחיו בחוץ ²³ ויקח שם ויפת את השמלה וישמו על שכם שניהם וילכו אחרנית ויכסו את ערות אביהם ופניהם אחרנית וערות אביהם לא ראו ²⁴ ויקץ נח מיינו וידע את אשר עשה לו בנו הקטן ²⁵ ויאמר ארור כנען עבד עבדים יהיה לאחיו ²⁶ ויאמר ברוך יהוה אלהי שם ויהי כנען עבד למו ²⁷ יפת אלהים ליפת וישכן באהלי שם ויהי כנען עבד למו ²⁸ ויחי נח אחרי המבול שלש מאות שנה וחמשים שנה ²⁹ ויהיו כל ימי נח תשע מאות שנה וחמשים שנה וימת