Números 10

¹ וידבר יהוה אל משה לאמר ² עשה לך שתי חצצרות כסף מקשה תעשה אתם והיו לך למקרא העדה ולמסע את המחנות ³ ותקעו בהן ונועדו אליך כל העדה אל פתח אהל מועד ⁴ ואם באחת יתקעו ונועדו אליך הנשיאים ראשי אלפי ישראל ⁵ ותקעתם תרועה ונסעו המחנות החנים קדמה ⁶ ותקעתם תרועה שנית ונסעו המחנות החנים צפונה תרועה יתקעו למסעיהם ⁷ ובהקהל את הקהל תתקעו ולא תריעו ⁸ ובני אהרן הכהנים יתקעו בחצצרות והיו לכם לחקת עולם לדרתיכם ⁹ וכי תבאו מלחמה בארצכם על הצר הצרר אתכם והרעתם בחצצרות ונזכרתם לפני יהוה אלהיכם ונושעתם מאיביכם ¹⁰ וביום שמחתיכם ובמועדיכם ובראשי חדשיכם ותקעתם בחצצרות על עלתיכם ועל זבחי שלמיכם והיו לכם לזכרון לפני יהוה אלהיכם אני יהוה אלהיכם וידבר יהוה אל משה לאמר רב לכם שבת בהר הזה פנו וסעו לכם ובאו הר האמרי ואל כל שכניו בערבה בהר ובשפלה בנגב ובחוף הים ארץ הכנעני והלבנון עד הנהר הגדול נהר פרת ראו נתתי לפניכם את הארץ באו ורשו את הארץ אשר נשבעתי לאבתיכם לאברהם ליצחק וליעקב לתת לזרעם אחריהם ¹¹ ויהי בשנה השנית בחדש השני בעשרים בחדש נעלה הענן מעל משכן העדות ¹² ויסעו בני ישראל למסעיהם ממדבר סיני וישכן הענן במדבר פראן ¹³ ויסעו בראישונה על פי יהוה ביד משה ¹⁴ ויסע דגל מחנה בני יהודה בראישונה לצבאתם ועל צבאו נחשון בן עמינדב ¹⁵ ועל צבא מטה בני יששכר נתנאל בן צוער ¹⁶ ועל צבא מטה בני זבולן אליאב בן חילן ¹⁷ והורד המשכן ונסעו בני גרשון ובני מררי נשאי המשכן ¹⁸ ונסע דגל מחנה בני ראובן לצבאתם ועל צבאו אליצור בן שדיאור ¹⁹ ועל צבא מטה בני שמעון שלמיאל בן צורישדי ²⁰ ועל צבא מטה בני גד אליסף בן דעואל ²¹ ונסעו הקהתים נשאי המקדש והקימו את המשכן עד באם ²² ונסע דגל מחנה בני אפרים לצבאתם ועל צבאו אלישמע בן עמיהוד ²³ ועל צבא מטה בני מנשה גמליאל בן פדהצור ²⁴ ועל צבא מטה בני בנימים אבידן בן גדעוני ²⁵ ונסע דגל מחנה בני דן מאסף לכל המחנות לצבאתם ועל צבאו אחיעזר בן עמישדי ²⁶ ועל צבא מטה בני אשר פגעיאל בן עכרן ²⁷ ועל צבא מטה בני נפתלי אחירע בן עינן ²⁸ אלה מסעי בני ישראל לצבאתם ויסעו ²⁹ ויאמר משה לחובב בן רעואל המדיני חתן משה נסעים אנחנו אל המקום אשר אמר יהוה אתו אתן לכם לך אתנו והטבנו לך כי יהוה דבר טוב על ישראל ³⁰ ויאמר אליו לא אלך כי אם אל ארצי ואל מולדתי אלך ³¹ ויאמר אל נא תעזב אתנו כי על כן ידעת חנתינו במדבר והיית לנו לעינים ³² והיה כי תלך עמנו והיה הטוב ההוא אשר ייטיב יהוה עמנו והיטבנו לך ³³ ויסעו מהר יהוה דרך שלשת ימים וארון ברית יהוה נסע לפניהם דרך שלשת ימים לתור להם מנוחה ³⁴ וענן יהוה עליהם יומם בנסעם מן המחנה ³⁵ ויהי בנסע הארון ויאמר משה קומה יהוה ויפצו איביך וינסו משנאיך מפניך ³⁶ ובמנוחה יאמר שובה יהוה רבבות אלפי ישראל