Números 21

¹ וישמע הכנעני מלך ערד ישב הנגב כי בא ישראל דרך האתרים וילחם בישראל וישב ממנו שבי ² וידר ישראל נדר ליהוה ויאמר אם נתן תתן את העם הזה בידי והחרמתי את עריהם ³ וישמע יהוה בקול ישראל ויתן את הכנעני בידו ויחרם אתם ואת עריהם ויקרא שם המקום חרמה ⁴ ויסעו מהר ההר דרך ים סוף לסבב את ארץ אדום ותקצר נפש העם בדרך ⁵ וידבר העם באלהים ובמשה למה הוצאתנו ממצרים למות במדבר כי אין לחם ואין מים ונפשנו קצה בלחם הקלקל ⁶ וישלח יהוה בעם את הנחשים השרפים וינשכו את העם יומת עם רב מישראל ⁷ ויבא העם אל משה ויאמרו חטאנו כי דברנו ביהוה ובך התפלל אל יהוה ויסר מעלינו את הנחש ויתפלל משה בעד העם ⁸ ויאמר יהוה אל משה עשה לך שרוף ושים אתו על הנס והיה כל הנשך וראה אתו וחי ⁹ ויעש משה נחש נחשת וישמהו על הנס והיה אם נשך הנחש את האיש והביט אל נחש הנחשת וחי ¹⁰ ויסעו בני ישראל ויחנו באבות ¹¹ ויסעו מאבות ויחנו בעיי העברים במדבר אשר על פני מואב מזרח השמש ¹² ויאמר יהוה אל משה אל תצור את מואב ואל תתגר בם . כי לא אתן לך מארצו ירשה כי לבני לוט נתתי את ער ירשה משם נסעו ויחנו בנחל זרד ¹³ וידבר יהוה אל משה לאמר אתה עבר היום את גבול מואב את ער וקרבת מול בני עמון אל תצורם ואל תתגר בם כי לא אתן מארץ בני עמון לך ירשה כי לבני לוט נתתיה ירשה ויסעו מנחל זרד ויחנו בעבר ארנן אשר על המדבר היוצא מגבול האמרי כי ארנן גבול מואב בין מואב ובין האמרי ¹⁴ על כן יאמר בספר מלחמות יהוה את והב בסופה ואת הנחלים ארנן ¹⁵ אשר הנחלם ואשר נטה לשבת עיר ונשען לגבול מואב ¹⁶ ומשם בארה היא הבאר אשר אמר יהוה אל משה אספה לי את העם ואתן להם מים ¹⁷ אז ישר ישראל את השירה הזאת עלי באר ענו לה ¹⁸ באר חפרוה שרים כרוה נדיבי העם במחקק ובמשענתם ממדבר מתנה ¹⁹ וממתנה נחלאל ומנחלאל במות ²⁰ ומבמות הגיא אשר בשדה מואב ראש הפסגה הנשקפה על פני הישמון ²¹ ויאמר יהוה אל משה קומו סעו ועברו את נחל ארנן ראה נתתי בידך את סיחון מלך חשבון האמרי ואת ארצו החל רש . . . והתגר בו מלחמה היום הזה החל תת פחדך ויראתך על פני העמים תחת כל השמים אשר ישמעו את שמעך ורגזו וחלו מפניך וישלח ישראל מלאכים אל סיחון מלך האמרי דברי שלום לאמר ²² אעברה בארצך בדרך המלך אלך לא אסור ימין ושמאל לא אטה בשדה ובכרם אכל בכסף תשברני ואכלתי ומים בכסף תתן לי ושתיתי רק אעברה ברגלי כאשר עשו לי בני עשו הישבים בשעיר והמואבים הישבים בער . . . . ²³ ולא נתן סיחון את ישראל עבר בגבולו ויאמר יהוה אל משה ראה החלתי תת לפניך את סיחון ואת ארצו החל רש לרשת את ארצו ויאסף סיחון את כל עמו ויצא לקראת ישראל המדברה ויבא יחצה וילחם בישראל ²⁴ ויכהו ישראל ואת בניו ואת כל עמו לפי חרב ויירשו את ארצו מארנן עד יבק עד בני עמון כי עז גבול בני עמון ²⁵ ויקח ישראל את כל הערים האלה וישב ישראל בכל ערי האמרי בחשבון ובכל בנתיה ²⁶ כי חשבון עיר סיחון מלך האמרי היא והוא הנלחם במלך מואב הראישון ויקח את כל ארצו מידו עד ארנן ²⁷ על כן יאמרו המשלים באי חשבון תבנה ותכונן עיר סיחון ²⁸ כי אש יצאה מחשבון להבה מקרית סיחון אכלה ער מואב בעלי במות ארנן ²⁹ אוי לך מואב אבדת עם כמוש נתן בניו פלטים ובנתיו בשבי למלך האמרי סיחון ³⁰ ונרם אבדה חשבון עד דיבון ונשים עד הנפח אש על מידבא ³¹ וישב ישראל בערי האמרי ³² וישלח משה לרגל את יעזר וילכדו בנתיה ויורשו את האמרי אשר שם ³³ ויפנו ויעלו דרך הבשן ויצא עוג מלך הבשן לקראתם הוא וכל עמו למלחמה אדרעי ³⁴ ויאמר יהוה אל משה אל תירא אתו כי בידך נתתי אתו ואת כל עמו ואת ארצו ועשית לו כאשר עשית לסיחון מלך האמרי אשר ישב בחשבון ³⁵ ויכו אתו ואת . . כל עמו עד בלתי השאיר לו שריד ויירשו את ארצו