Números 28

¹ וידבר יהוה אל משה לאמר ² צוה את בני ישראל ואמרת אליהם את קרבני לחמי לאשי ריח ניחחי תשמרו להקריב לי במועדיו ³ ואמרת להם זה האש אשר תקריבו ליהוה כבשים בני שנה תמימם שנים ליום עלת תמיד ⁴ את הכבש האחד תעשה בבקר ואת הכבש השני תעשה בין הערבים ⁵ ועשרית האיפה סלת למנחה בלולה בשמן . רביעת ההין ⁶ עלת תמיד העשויה בהר סיני לריח ניחח אשה ליהוה ⁷ ונסכו רבעית ההין לכבש האחד בקדש הסך נסך שכר ליהוה ⁸ ואת הכבש השני תעשה בין הערבים כמנחת הבקר וכנסכו תעשה אשה ריח ניחח ליהוה ⁹ וביום השבת שני כבשים בני שנה תמימם ושני עשרנים סלת מנחה בלולה בשמן ונסכו ¹⁰ עלת שבת בשבת על עלת התמיד ונסכיהם ¹¹ ובראשי חדשיכם תקריבו עלה ליהוה פרים בני בקר שנים ואיל אחד כבשים בני שנה שבעה תמימם ¹² ושלשה עשרנים סלת מנחה בלולה בשמן לפר האחד ושני עשרנים סלת מנחה בלולה בשמן לאיל האחד ¹³ ועשרון עשרון סלת מנחה בלולה בשמן לכבש האחד עלה ריח ניחח אשה ליהוה ¹⁴ ונסכיהם חצי ההין יין לפר האחד ושלשית ההין לאיל ורביעת ההין לכבש האחד יין זאת עלת החדש בחדשו לחדשי השנה ¹⁵ ושעיר עזים אחד לחטאת ליהוה על עלת התמיד יעשו ונסכיהם ¹⁶ בחדש הראישון בארבעה עשר יום לחדש פסח ליהוה ¹⁷ ובחמשה עשר יום לחדש הזה חג שבעת ימים מצות תאכלו ¹⁸ ביום הראישון מקרא קדש כל מלאכת עבדה לא תעשו ¹⁹ והקרבתם אשה עלה ליהוה פרים בני בקר שנים ואיל אחד ושבעה כבשים בני שנה תמימם יהיו לכם ²⁰ ומנחתם סלת בלולה בשמן שלשה עשרנים לפר ושני עשרנים לאיל תעשו ²¹ ועשרון עשרון . לכבש האחד לשבעת הכבשים ²² ושעיר עזים אחד לחטאת . לכפר עליכם ²³ מלבד עלת הבקר אשר לעלת התמיד תעשו את אלה ²⁴ כאלה ליום תעשו שבעת הימים לחם אשה לריח ניחח ליהוה על עלת התמיד יעשו ונסכיהם ²⁵ וביום השביעי מקרא קדש יהיה לכם כל מלאכת עבדה לא תעשו ²⁶ ביום הבכרים בהקרבכם מנחה חדשה ליהוה בשבעתיכם מקרא קדש יהיה לכם כל מלאכת עבדה לא תעשו ²⁷ והקרבתם עלה אשה ריח ניחח ליהוה פרים בני בקר שנים ואיל אחד . כבשים בני שנה שבעה תמימם יהיו לכם ²⁸ ומנחתם סלת בלולה בשמן שלשה עשרנים לפר האחד ושני עשרנים לאיל האחד ²⁹ ועשרון עשרון לכבש האחד לשבעת הכבשים ³⁰ ושעיר עזים אחד לחטאת לכפר עליכם ³¹ מלבד עלת התמיד ומנחתה תעשו . תמימם יהיו לכם ונסכיהם