Números 8

¹ וידבר יהוה אל משה לאמר ² דבר אל אהרן ואמרת אליו בהעלותך את הנרות אל מול פני המנורה יאירו שבעת הנרות ³ ויעש כן אהרן אל מול פני המנורה העלה נרתיה כאשר צוה יהוה את משה ⁴ וזה מעשה המנורה מקשה זהב עד ירכיה ועד פרחיה מקשה היא כמראה אשר הראה יהוה את משה כן עשה את המנורה ⁵ וידבר יהוה אל משה לאמר ⁶ קח את הלוים מתוך בני ישראל וטהרת אתם ⁷ וכה תעשה להם לטהרם הזה עליהם מי חטאת והעבירו תער על כל בשרם וכבסו בגדיהם והטהרו ⁸ ולקחו פר בן בקר ומנחתו סלת בלולה בשמן ופר שני בן בקר תקח לחטאת ⁹ והקרבת את הלוים לפני אהל מועד והקהלת את כל עדת בני ישראל ¹⁰ והקרבת את הלוים לפני יהוה וסמכו בני ישראל את ידיהם על הלוים ¹¹ והניף אהרן את הלוים תנופה לפני יהוה מאת בני ישראל והיו לעבד את עבדת יהוה ¹² והלוים יסמכו את ידיהם על ראש הפרים ועשה את האחד חטאת ואת האחד עלה ליהוה לכפר על הלוים ¹³ והעמדת את הלוים לפני אהרן ולפני בניו והנפת אתם תנופה ליהוה ¹⁴ והבדלת את הלוים מתוך בני ישראל והיו לי הלוים ¹⁵ ואחרי כן יבאו הלוים לעבד את עבדת אהל מועד וטהרת אתם והנפת אתם תנופה ¹⁶ כי נתנים נתנים הם לי מתוך בני ישראל תחת כל בכור פטר רחם . בבני ישראל לקחתי אתם לי ¹⁷ כי לי כל בכור בבני ישראל באדם ובבהמה ביום הכיתי כל בכור בארץ מצרים הקדשתי אתם לי ¹⁸ ואקח את הלוים תחת כל בכור בבני ישראל ¹⁹ ואתנה את הלוים נתנים לאהרן ולבניו מתוך בני ישראל לעבד את עבדת בני ישראל באהל מועד ולכפר על בני ישראל ולא יהיה בבני ישראל נגף בגשת בני ישראל אל הקדש ²⁰ ויעש משה ואהרן וכל עדת בני ישראל ללוים ככל אשר צוה יהוה את משה ללוים כן עשו להם בני ישראל ²¹ ויתחטאו הלוים ויכבסו בגדיהם וינף אהרן אתם תנופה לפני יהוה ויכפר עליהם אהרן לטהרם ²² ואחרי כן באו הלוים לעבד את עבדתם באהל מועד לפני אהרן ולפני בניו כאשר צוה יהוה את משה על הלוים כן עשו להם ²³ וידבר יהוה אל משה לאמר ²⁴ זאת אשר ללוים מבן חמש ועשרים שנה ומעלה יבוא לצבא צבא בעבדת אהל מועד ²⁵ ומבן חמשים שנה ישוב מצבא העבדה ולא יעבד עוד ²⁶ ושרת את אחיו באהל מועד לשמר משמרת ועבדה לא יעבד ככה תעשה ללוים במשמרתם