Deuteronomio 32

¹ האזינו השמים ואדברה ותשמע הארץ אמרי פיי ² יערף כמטר לקחי ותזל כטל אמרתי כשעירים עלי דשא וכרביבים עלי עשב ³ כי בשם יהוה אקרא והבו גדל לאלהינו ⁴ הצור תמים פעלו כי כל דרכיו משפט אל אמונה ואין עול צדיק וישר הוא ⁵ שחתו לו לא בני מום דור עקש ופתלתל ⁶ הליהוה תגמלו זאת עם נבל ולא חכם הלוא הוא אביך קנך הוא עשך ויכוננך ⁷ זכרו יומת עולם בינו שנת דר ודר שאל אביך ויגידך זקניך ויאמרו לך ⁸ בהנחל עליון גוים בהפרידו בני אדם יצב גבלות עמים למספר בני . ישראל ⁹ כי חלק יהוה עמו יעקב חבל נחלתו ישראל ¹⁰ יאמצהו בארץ המדבר ובתהללות . ישמנהו יסבבנהו ויבננהו ויצרנהו כאישן עינו ¹¹ כנשר יער קנו ועל גוזליו ירחף יפרש כנפיו ויקחהו ישאהו על אברתו ¹² יהוה בדד ינחנו ואין עמו אל נכר ¹³ ירכבהו על במתי הארץ יאכלהו תנופת שדי יינקהו דבש מסלע ושמן מחלמש צור ¹⁴ חמת בקר וחלב צאן עם חמת כרים ואילים בני בשן ועתודים עם חלב כליות חטה ודם ענב תשתה חמר יאכל יעקב וישבע ¹⁵ ישמן ישרון ויבעט שמנת עבית כשית ויטש אלה עשהו וינבלו צור ישועתו ¹⁶ יקנאהו בזרים ובתועבת יכעסהו ¹⁷ יזבחו לשדים לא אלה אלהים לא ידעום חדשים מקרב באו לא שערום אבתיכם ¹⁸ צור ילדך תשא ותשכח אל מהללך ¹⁹ וירא יהוה וינאץ מכעס בניו ובנתיו ²⁰ ויאמר אסתיר פני מהם ואראה מה אחריתם כי דור הפכות הם בנים לא האמן בם ²¹ הם קנאוני בלא אל כעסוני באבליהם ואני אקניאם בלא עם בגוי נבל אכעיסם ²² כי אש קדחה באפי ותוקד עד שאל תחתית תאכל ארץ ויבולה תלהט מוסדי הרים ²³ אספה עליהם רעות וחצי אכלה בם ²⁴ מזה רעב לחמו רשף קטף מררים ושן בהמות אשלח בם עם חמת זחלי עפר ²⁵ מחוץ תשכל חרב ומחדרים אימה גם בחור גם בתולה וינק עם איש שיבה ²⁶ אמרתי אפיהם אשבית מאנוש זכרם ²⁷ לו לא כעס איבי אגור פן ינכרו צרינו פן יאמרו ידנו רמה ולא יהוה פעל כל זאת ²⁸ כי גוי אבד עצותם . ואין בהם תבונה ²⁹ ולא חכמו וישכלו זאת ויבינו לאחריתם ³⁰ איך ירדף אחד אלף ושנים יניסו רבבה אם לא . צורם מכרם ויהוה הסגירם ³¹ כי לא כצורנו צורם ואיבינו פללים ³² כי מגפן סדם גפנם ומשדמות עמרה ענביהם ענבי ראש ואשכלי מררות למו ³³ חמת תנינים יינם וראש פתנים אך זרי ³⁴ הלוא הוא כנוס עמדי חתום באוצרתי ³⁵ ליום נקם ושלם לעת תמוט רגלם כי קרוב יום אידם וחש עתידת למו ³⁶ כי ידין יהוה עמו ועל עבדיו יתנחם כי יראה כי אזלת יד ואפס עצור ועזוב ³⁷ ואמרו . איה אלהימו . צור . חסיו בו ³⁸ אשר חלב זבחיהם יאכלו וישתו יין נסכם יקומו ויעזרוכם יהיו עליכם סתרה ³⁹ ראו עתה כי אני אני הוא ואין אלהים עמדי אני אמית ואחיה מחצתי ואנכי ארפא ואין מידי מציל ⁴⁰ כי אשא אל השמים ידי ואמרתי חי אנכי לעלם ⁴¹ אם שנתי ברק חרבי ותאחז במשפט ידי אשיב נקם לצרי ולמשנאי אשלם ⁴² אשכיר חצי מדם וחרבי תאכל בשר מדם חלל ושביה מראש פרעת אויב ⁴³ הרנינו גוים עמו . . . . כי דם עבדיו יקם ונקם ישיב לצריו . . וכפר אדמת עמו ⁴⁴ ויבא משה וידבר את כל דברי השירה הזאת באזני העם הוא ויהושע בן נון ⁴⁵ ויכל משה מדבר את . הדברים האלה אל כל ישראל ⁴⁶ ויאמר אליהם שימו לבבכם על כל הדברים אשר אנכי מעיד בכם היום אשר תצום את בניכם לשמר ולעשות את כל דברי התורה הזאת ⁴⁷ כי לא דבר רק הוא מכם כי הוא חייכם ובדבר הזה תאריכון ימים על האדמה אשר אתם עברים את הירדן שמה לרשתה ⁴⁸ וידבר יהוה אל משה בעצם היום הזה לאמר ⁴⁹ עלה אל הר העברים הזה הר נבא אשר בארץ מואב אשר על פני יריחו וראה את ארץ כנען אשר אני נתן לבני ישראל לאחזה ⁵⁰ ומות בהר אשר אתה עלה שמה והאסף אל עמך כאשר מת אהרן אחיך בהר ההר ויאסף אל עמו ⁵¹ על אשר מעלתם בי בתוך בני ישראל במי מריבת קדש מדבר צן על אשר לא קדשתם אתי בתוך בני ישראל ⁵² כי מנגד תראה את הארץ ושמה לא תבוא אל הארץ אשר אני נתן לבני ישראל