Éxodo 39

¹ ומן התכלת והארגמן ותולעת השני עשו בגדי שרד לשרת בקדש ויעשו את בגדי הקדש אשר לאהרן כאשר צוה יהוה את משה ² ויעשו את האפוד זהב תכלת וארגמן ותולעת שני ושש משזר ³ וירקעו את פחי הזהב וקצצו פתלים לעשות בתוך התכלת ובתוך הארגמן ובתוך התולעת השני ובתוך השש מעשה חשב ⁴ כתפות עשה לו חברות על שני קצתיו חבר ⁵ וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר כאשר צוה יהוה את משה ⁶ ויעשו את אבני השהם מוסבת משבצות זהב מפתחות פתוחי חותם על שמות בני ישראל ⁷ וישמו אתם על כתפות האפוד אבני זכרון לבני ישראל כאשר צוה יהוה את משה ⁸ ויעשו את החשן מעשה חשב כמעשה האפוד זהב תכלת וארגמן ותולעת שני ושש משזר ⁹ רבוע היה כפול עשה את החשן זרת ארכו וזרת רחבו . ¹⁰ וימלאו בו ארבעה טורי אבן טור אדם פטדה וברקת הטור האחד ¹¹ והטור השני נפך ספיר ויהלם ¹² והטור השלישי לשם שבו ואחלמה ¹³ והטור הרביעי תרשיש שהם וישפה מוסבת משבצות זהב במלאתם ¹⁴ והאבנים על שמות בני ישראל הנה שתים עשרה על שמותם פתוחי חותם איש על שמו לשנים עשר שבט ¹⁵ ויעשו על החשן שרשרות גבלות מעשה עבות זהב טהור ¹⁶ ויעשו שתי משבצות זהב ושתי טבעות זהב ויתנו את שתי הטבעות על שני קצות החשן ¹⁷ ויתנו את שתי עבתות הזהב על שתי הטבעות על קצות החשן ¹⁸ ואת שתי הקצות שתי העבתות נתנו על שתי המשבצות ויתנם על כתפות האפוד אל מול פניו ¹⁹ ויעשו שתי טבעות זהב וישמו על שני קצות החשן על שפתו אשר על עבר האפוד ביתה ²⁰ ויעשו שתי טבעות זהב ויתנם על שתי כתפות האפוד מלמטה ממול פניו לעמת מחברתו ממעל לחשב האפוד ²¹ וירכסו את החשן מטבעתו אל טבעת האפוד . . . . . בפתיל תכלת להיות על חשב האפוד . ולא יזח החשן מעל האפוד . . . . . . . . . . כאשר צוה יהוה את משה ויעשו את הארים ואת התמים כאשר צוה יהוה את משה ²² ויעשו את המעיל . מעשה ארג כליל תכלת ²³ ופי המעיל בתוכו כפי תחרא שפה לפיו סביב לא יקרע ²⁴ ויעשו על שולי המעיל רמוני תכלת וארגמן ותולעת שני ושש משזר ²⁵ ויעשו פעמוני זהב טהור ויתנו את הפעמונים . . על שולי המעיל סביב בתוך הרמונים ²⁶ פעמון זהב ורמון פעמון זהב ורמון על שולי המעיל סביב לשרת כאשר צוה יהוה את משה ²⁷ ויעשו את הכיתנת שש מעשה ארג לאהרן ולבניו ²⁸ ואת המצנפת שש ואת פארי המגבעות שש ואת מכנסי הבד שש משזר ²⁹ ואת האבניט שש משזר תכלת וארגמן ותולעת שני מעשה רקם כאשר צוה יהוה את משה ³⁰ ויעשו את ציץ נזר הקדש זהב טהור ויכתבו עליו מכתב פתוחי חותם קדש ליהוה ³¹ ויתנו עליו פתיל תכלת לתת על המצנפת מלמעלה כאשר צוה יהוה את משה ³² ותכל כל עבדת המשכן אהל מועד ויעשו בני ישראל . כאשר צוה יהוה את משה כן עשו ³³ ויביאו את המשכן אל משה את האהל ואת כל כליו קרסיו קרשיו בריחיו עמדיו ואדניהם ³⁴ ואת מכסה עורת האילים המאדמים ואת מכסה עורת התחשים ואת פרכת המסך ³⁵ את ארון העדות ואת בדיו ואת הכפרת ³⁶ את השלחן ואת כל כליו ואת לחם הפנים ³⁷ את המנורה הטהרה ואת נרתיה נרת המערכה ואת כל כליה ואת שמן המאור ³⁸ את מזבח הזהב ואת שמן המשחה ואת קטרת הסמים ואת מסך פתח האהל ³⁹ את מזבח הנחשת ואת מכבר הנחשת אשר לו ואת בדיו ואת כל כליו את הכיור ואת כנו ⁴⁰ את קלעי החצר ואת עמודיה ואת אדניה ואת המסך לשער החצר את מיתריה ואת יתדתיה ואת כל כלי עבדת המשכן לאהל מועד ⁴¹ את בגדי השרד לשרת בקדש ואת בגדי הקדש לאהרן הכהן ואת בגדי בניו לכהן ⁴² ככל אשר צוה יהוה את משה כן עשו בני ישראל את כל העבדה ⁴³ וירא משה את כל המלאכה והנה עשו אתה כאשר צוה יהוה כן עשו ויברך אתם משה