Génesis 29

¹ וישא יעקב רגליו וילך ארץ בני קדם ² וירא והנה באר בשדה והנה שם שלשה עדרי צאן רבצים עליה כי מן הבאר ההיא ישקו העדרים ואבן גדלה על פי הבאר ³ ונאספו שם כל הרעים וגללו את האבן מעל פי הבאר והשקו את הצאן והשיבו את האבן על פי הבאר למקומה ⁴ ויאמר להם יעקב אחי מאין אתם ויאמרו מחרן אנחנו ⁵ ויאמר להם הידעתם את לבן בן נחור ויאמרו ידענו ⁶ ויאמר להם השלום לו ויאמרו שלום והנה רחל בתו באה עם הצאן ⁷ ויאמר להם הן עוד היום גדול לא עת האסף המקנה השקו הצאן ולכו רעו ⁸ ויאמרו לא נוכל עד אשר יאספו כל הרעים וגללו את האבן מעל פי הבאר והשקינו הצאן ⁹ עודנו מדבר עמם ורחל באה עם הצאן אשר לאביה כי רעה היא ¹⁰ ויהי כאשר ראה יעקב את רחל בת לבן אחי אמו ואת צאן לבן אחי אמו ויגש יעקב ויגל את האבן מעל פי הבאר וישק את צאן לבן אחי אמו ¹¹ וישק יעקב לרחל וישא את קולו ויבך ¹² ויגד יעקב לרחל כי אחי אביה הוא וכי בן רבקה הוא ותרץ ותגד לאביה ¹³ ויהי כשמע לבן את שמע יעקב בן אחתו וירץ לקראתו ויחבק לו וינשק לו ויבאהו אל ביתו ויספר ללבן את כל הדברים האלה ¹⁴ ויאמר לו לבן אך עצמי ובשרי אתה וישב עמו חדש ימים ¹⁵ ויאמר לבן ליעקב הכי אחי אתה ועבדתני חנם הגידה לי מה משכרתך ¹⁶ וללבן שתי בנות שם הגדלה לאה ושם הקטנה רחל ¹⁷ ועיני לאה רכות ורחל היתה יפת תאר ויפת מראה ¹⁸ ויאהב יעקב את רחל ויאמר אעבדך שבע שנים ברחל בתך הקטנה ¹⁹ ויאמר לבן טוב תתי אתה לך מתתי אתה לאיש אחר שב עמדי ²⁰ ויעבד יעקב ברחל שבע שנים ויהיו בעיניו כימים אחדים באהבתו אתה ²¹ ויאמר יעקב אל לבן הבה את אשתי כי מלאו ימי ואבא אליה ²² ויאסף לבן את כל אנשי המקום ויעש משתה ²³ ויהי בערב ויקח את לאה בתו ויבא אתה אליו ויבא אליה יעקב ²⁴ ויתן לבן . את זלפה שפחתו ללאה בתו לשפחה ²⁵ ויהי בבקר והנה היא לאה ויאמר אל לבן מה זאת עשית לי הלוא ברחל עבדתי עמך ולמה רמיתני ²⁶ ויאמר לבן לא יעשה כן במקומנו לתת הצעירה לפני הבכירה ²⁷ מלא שבע זאת ואתן לך גם את זאת בעבדה אשר תעבד עמדי עוד שבע שנים אחרות ²⁸ ויעש יעקב כן וימלא שבע זאת ויתן לו את רחל בתו לו לאשה ²⁹ ויתן לבן לרחל בתו את בלהה שפחתו לה לשפחה ³⁰ ויבא גם אל רחל ויאהב גם את רחל מלאה ויעבד עמו עוד שבע שנים אחרות ³¹ וירא יהוה כי שנואה לאה ויפתח את רחמה ורחל עקרה ³² ותהר לאה ותלד בן ותקרא את שמו ראובן כי אמרה כי ראה יהוה בעניי כי עתה יאהבני אישי ³³ ותהר עוד ותלד בן ותאמר כי שמע יהוה כי שנואה אנכי ויתן לי גם את זה ותקרא את שמו שמעון ³⁴ ותהר עוד ותלד בן ותאמר עתה הפעם ילוה אישי אלי כי ילדתי לו שלשה בנים על כן קראה שמו לוי ³⁵ ותהר עוד ותלד בן ותאמר הפעם אודה את יהוה על כן קראה שמו יהודה ותעמד מלדת