Génesis 31

¹ וישמע את דברי בני לבן לאמר לקח יעקב את כל אשר לאבינו ומאשר לאבינו עשה את כל הכבוד הזה ² וירא יעקב את פני לבן והנה אינם עמו כתמול שלשום ³ ויאמר יהוה אל יעקב שוב אל ארץ אבתיך ואל מולדתך ואהיה עמך ⁴ וישלח יעקב ויקרא לרחל וללאה השדה אל צאנו ⁵ ויאמר להן ראה אנכי את פני אביכן כי אינם אלי כתמול שלשום ואלהי אבי היה עמדי ⁶ ואתן ידעתן כי בכל כחי עבדתי את אביכן ⁷ ואביכן התל בי ויחלף את משכרתי עשרת מנים ולא נתנו יהוה להריע עמדי ⁸ אם כה יאמר נקדים יהיה שכרך וילדו כל הצאן נקדים ואם כה יאמר עקדים יהיה שכרך וילדו כל הצאן עקדים ⁹ ויצל יהוה את מקנה אביכן ויתן לי ¹⁰ ויהי בעת יחם הצאן ואשא עיני ואראה בחלום והנה העתודים העלים על הצאן עקדים נקדים וברדים ¹¹ ויאמר אלי מלאך האלהים בחלום יעקב ואמר הנני ¹² ויאמר שא נא עיניך וראה את כל העתודים העלים על הצאן עקדים נקדים וברדים כי ראיתי את כל אשר לבן עשה לך ¹³ אנכי האל בית אל אשר משחת שם מצבה ואשר נדרת לי שם נדר ועתה קום צא מן הארץ הזאת ושוב אל ארץ מולדתך ¹⁴ ותען רחל ולאה ותאמרנה לו העוד לנו חלק ונחלה בבית אבינו ¹⁵ הלוא כנכריות נחשבנו לו כי מכרנו ויאכל גם אכל את כספנו ¹⁶ כי כל העשר אשר הציל יהוה מאבינו לנו הוא ולבנינו ועתה כל אשר אמר אליך אלהים עשה ¹⁷ ויקם יעקב וישא את נשיו ואת בניו על הגמלים ¹⁸ וינהג את כל מקנהו ואת כל רכשו אשר רכש מקנה קנינו אשר רכש בפדן ארם לבוא אל יצחק אביו ארצה כנען ¹⁹ ולבן הלך לגז את צאנו ותגנב רחל את התרפים אשר לאביה ²⁰ ויגנב יעקב את לב לבן הארמי עד בלתי הגיד לו כי ברח הוא ²¹ ויברח הוא וכל אשר לו ויקם ויעבר את הנהר וישם את פניו הר הגלעד ²² ויגד ללבן ביום השלישי כי ברח יעקב ²³ ויקח את אחיו עמו וירדף אחריו דרך שבעת ימים וידבק אתו בהר הגלעד ²⁴ ויבא אלהים אל לבן הארמי בחלום הלילה ויאמר לו השמר לך פן תדבר עם יעקב מטוב עד רע ²⁵ וישג לבן את יעקב ויעקב תקע את אהלו בהר ולבן תקע את אחיו בהר הגלעד ²⁶ ויאמר לבן ליעקב מה עשית ותגנב את לבבי ותנהג את בנותי כשביות חרב ²⁷ למה נחבת לברח ותגנב אתי ולא הגדת לי ואשלחך בשמחה ובשרים בתף ובכנר ²⁸ ולא נטשתני לנשק לבני ולבנותי עתה הסכלת עשות ²⁹ יש לאל ידי לעשות עמך רע ואלהי אביך אמש אמר אלי לאמר השמר לך מדבר עם יעקב מטוב עד רע ³⁰ ועתה הלך הלכת כי נכסף נכספת לבית אביך למה גנבת את אלהי ³¹ ויען יעקב ויאמר ללבן כי יראתי כי אמרתי פן תגזל את בנתיך מעמי ³² עם אשר תמצא את אלהיך לא יחיה נגד אחינו הכר לך מה עמדי וקח לך ולא ידע יעקב כי רחל גנבתם ³³ ויבא לבן ויחפש באהל יעקב ובאהל לאה ובאהל שתי השפחות ולא מצא ויצא מאהל לאה ויבא באהל רחל ³⁴ ורחל לקחה את התרפים ותשמם בכר הגמל ותשב עליהם וימשש לבן את כל האהל ולא מצא ³⁵ ותאמר אל אביה אל יחר בעיני אדני כי לוא אוכל לקום מפניך כי דרך הנשים לי ויחפש ולא מצא את התרפים ³⁶ ויחר ליעקב וירב בלבן ויען יעקב ויאמר ללבן מה פשעי ומה חטאתי כי דלקת אחרי ³⁷ וכי מששת את כל כלי מה מצאת מכל כלי ביתך שים כה נגד אחי ואחיך ויוכיחו בין שנינו ³⁸ זה עשרים שנה אנכי עמך רחליך ועזיך לא שכלו אילי צאנך לא אכלתי ³⁹ טרפה לא הבאתי אליך אנכי אחטנה מידי . גנובת יום וגנובת לילה ⁴⁰ הייתי ביום אכלני חרב וקרח בלילה ותדד שנתי מעיני ⁴¹ זה לי עשרים שנה בביתך עבדתיך ארבע עשרה שנה בשתי בנתיך ושש שנים בצאנך ותחלף את משכרתי עשרת מנים ⁴² לו לא אלהי אבי אלהי אברהם ופחד יצחק היה לי כי עתה ריקם שלחתני את עניי ואת יגע כפי ראה אלהים ויוכיח אמש ⁴³ ויען לבן ויאמר אל יעקב הבנות בנותי והבנים בני והצאן צאני וכל אשר אתה ראה לי הוא ולבנותי מה אעשה לאלה היום או לבניהם אשר ילדו ⁴⁴ ועתה לכה נכרתה ברית אני ואתה והיה לעד ביני ובינך ⁴⁵ ויקח יעקב אבן וירמה מצבה ⁴⁶ ויאמר יעקב לאחיו לקטו אבנים ויקחו אבנים ויעשו גל ויאכלו שם על הגל ⁴⁷ ויקרא לו לבן יגר שהדותה ויעקב קרא לו גלעד ⁴⁸ ויאמר לבן הגל הזה עד ביני ובינך היום על כן קרא שמו גלעד ⁴⁹ והמצבה אשר אמר יצף יהוה ביני ובינך כי נסתר איש מרעהו ⁵⁰ אם תענה את בנותי ואם תקח נשים על בנותי אין איש עמנו ראה אלהים עד ביני ובינך ⁵¹ ויאמר לבן ליעקב הנה הגל הזה והנה המצבה אשר ירית ביני ובינך ⁵² עד הגל הזה ועדה המצבה אם אני לא אעבר אליך את הגל הזה ואם אתה לא תעבר אלי את הגל הזה ואת המצבה הזאת לרעה ⁵³ אלהי אברהם ואלהי נחור ישפט ביננו אלהי אברהם וישבע יעקב בפחד אביו יצחק ⁵⁴ ויזבח יעקב זבח בהר ויקרא לאחיו לאכל לחם ויאכלו לחם וילינו בהר ⁵⁵ 0