Génesis 34

¹ ותצא דינה בת לאה אשר ילדה ליעקב לראות בבנות הארץ ² וירא אתה שכם בן חמור החוי נשיא הארץ ויקח אתה וישכב אתה ויענה ³ ותדבק נפשו בדינה בת יעקב ויאהב את הנערה וידבר אל לב הנערה ⁴ ויאמר שכם אל . אביו לאמר קח לי את הילדה הזאת לאשה ⁵ ויעקב שמע כי טמא את דינה בתו ובניו היו את מקנהו בשדה והחריש יעקב עד באם ⁶ ויצא חמור אבי שכם אל יעקב לדבר אתו ⁷ ובני יעקב באו מן השדה כשמעם ויתעצבו האנשים ויחר להם מאד כי נבלה עשה בישראל לשכב את בת יעקב וכן לא יעשה ⁸ וידבר חמור אתם לאמר שכם בני חשקה נפשו בבתכם תנו נא אתה לו לאשה ⁹ והתחתנו אתנו בנתיכם תתנו לנו ואת בנתינו תקחו לכם ¹⁰ ואתנו תשבו והארץ תהיה לפניכם שבו סחרוה ואחזו בה ¹¹ ויאמר שכם אל אביה ואל אחיה אמצא חן בעיניכם ואשר תאמרו אלי אתן ¹² הרבו עלי מהר מאד ומתנה ואתן כאשר תאמרו אלי ותנו לי את הנערה לאשה ¹³ ויענו בני יעקב את שכם ואת חמור אביו במרמה וידברו אשר טמאו את דינה אחתם ¹⁴ ויאמרו אליהם לא נוכל לעשות את הדבר הזה לתת את אחתנו לאיש אשר לו ערלה כי חרפה היא לנו ¹⁵ אך בזאת נאות לכם אם תהיו כמונו להמול לכם כל זכר ¹⁶ ונתנו את בנתינו לכם ואת בנתיכם נקח לנו וישבנו אתכם והיינו כעם אחד ¹⁷ ואם לא תשמעו אלינו להמול ולקחנו את בתנו והלכנו ¹⁸ וייטבו דבריהם בעיני חמור ובעיני שכם בנו . ¹⁹ ולא אחר הנער לעשות הדבר כי חפץ בבת יעקב והוא נכבד מכל בית אביו ²⁰ ויבא חמור ושכם בנו אל שער עירם וידברו אל אנשי עירם לאמר ²¹ האנשים האלה שלמים הם אתנו ישבו בארץ ויסחרו אתה והארץ הנה רחבות ידים לפניהם את בנותם נקח לנו לנשים ואת בנתינו נתן להם ²² אך בזאת יאותו לנו האנשים לשבת אתנו להיות לעם אחד בהמול לנו כל זכר כאשר הם נמלים ²³ מקניהם וקנינם וכל בהמתם הלוא לנו הם אך נאות להם וישבו אתנו ²⁴ וישמעו אל חמור ואל שכם בנו כל יצאי שער עירו וימלו כל זכר כל יצאי שער עירו ²⁵ ויהי ביום השלישי בהיותם כאבים ויקחו שני בני יעקב שמעון ולוי אחי דינה איש חרבו ויבאו על העיר בטח ויהרגו כל זכר ²⁶ ואת חמור ואת שכם בנו הרגו לפי חרב ויקחו את דינה מבית שכם ויצאו ²⁷ ובני יעקב באו על החללים ויבזו העיר אשר טמאו אחתם ²⁸ ואת צאנם ואת בקרם ואת חמריהם ואת אשר בעיר ואת אשר בשדה לקחו ²⁹ ואת כל חילם ואת . טפם ואת נשיהם שבו ויבזו את כל אשר בבית ³⁰ ויאמר יעקב אל שמעון ואל לוי עכרתם אתי להבאשני ביושב הארץ בכנעני ובפרזי ואני מתי מספר ונאספו עלי והכני ונשמדתי אני וביתי ³¹ ויאמרו הכ זונה יעשו את אחותנו