Génesis 37

¹ וישב יעקב בארץ מגרי אביו בארץ כנען ² אלה תולדת יעקב יוסף בן שבע עשרה שנה היה רעה את אחיו בצאן והוא נער את בני בלהה ואת בני זלפה נשי אביו ויבא יוסף את דבתם רעה אל אביהם ³ וישראל אהב את יוסף מכל בניו כי בן זקנים הוא לו ויעש לו כיתנת פסים ⁴ ויראו אחיו כי אתו אהב אביהם מכל בניו וישנאו אתו ולא יכלו דברו לשלום ⁵ ויחלם יוסף חלום ויגד לאחיו ויוספו עוד שנא אתו ⁶ ויאמר אליהם שמעו נא החלום הזה אשר חלמתי ⁷ והנה אנחנו מאלמים אלמים בתוך השדה והנה קמה אלמתי וגם נצבה והנה תסבנה אלמתיכם ותשתחוינה לאלמתי ⁸ ויאמרו לו אחיו המלך תמלך עלינו אם משל תמשל בנו ויוספו עוד שנא אתו על חלמיו ועל דבריו ⁹ ויחלם עוד חלום אחר ויספר אתו לאחיו ויאמר הנה חלמתי חלום עוד והנה השמש והירח ואחד עשר כוכבים משתחוים לי ¹⁰ ויספר לאביו . ולאחיו . ויגער בו אביו ויאמר לו מה החלום הזה אשר חלמת הבא נבוא אני ואמך ואחיך להשתחות לך ארצה ¹¹ ויקנאו בו אחיו ואביו שמר את הדבר ¹² וילכו אחיו לרעות את צאן אביהם בשכם ¹³ ויאמר ישראל אל יוסף הלוא אחיך רעים בשכם לך ואשלחך אליהם ויאמר לו הנני ¹⁴ ויאמר לו לך נא וראה את שלום אחיך ואת שלום הצאן והשבני דבר וישלחהו מעמק חברון ויבא שכמה ¹⁵ וימצאהו האיש והנה תעה בשדה וישאלהו האיש לאמר מה תבקש ¹⁶ ויאמר את אחי אנכי מבקש הגידה נא לי איפה הם רעים ¹⁷ ויאמר האיש נסעו מזה כי שמעתם אמרים נלכה דתינה וילך יוסף אחרי אחיו וימצאם בדתין ¹⁸ ויראו אתו מרחק בטרם יקרב אליהם ויתנכלו אתו להמיתו ¹⁹ ויאמרו איש אל אחיו הנה בעל החלמות הלז בא ²⁰ ועתה לכו ונהרגהו ונשלכהו באחד הברות ואמרנו חיה רעה אכלתו ונראה מה יהיה חלמתיו ²¹ וישמע ראובן ויצלו מידם ויאמר לא נכנו נפש ²² ויאמר אליהם ראובן אל תשפכו דם השליכו אתו אל הבור הזה אשר במדבר ויד אל תשלחו בו למען הציל אתו מידם להשיבו אל אביו ²³ ויהי כאשר בא יוסף אל אחיו ויפשטו את יוסף את כיתנתו את כיתנת הפסים אשר עליו ²⁴ ויקחו וישלכו אתו הבור והבור רק אין בו מים ²⁵ וישבו לאכל לחם וישאו עיניהם ויראו והנה ארחת ישמעאלים באה מגלעד וגמליהם נשאים נכאת וצרי ולוט הלכים להוריד מצרימה ²⁶ ויאמר יהודה אל אחיו מה בצע כי נהרג את אחינו וכסינו את דמו ²⁷ לכו ונמכרנו לישמעאלים וידנו אל תהיה בו כי אחינו ובשרנו הוא וישמעו אחיו ²⁸ ויעברו אנשים מדינים סחרים וימשכו ויעלו את יוסף מן הבור וימכרו את יוסף לישמעאלים בעשרים כסף ויביאו את יוסף מצרימה ²⁹ וישב ראובן אל הבור והנה אין יוסף בבור ויקרע את בגדיו ³⁰ וישב אל אחיו ויאמר הילד איננו ואני אנה אני בא ³¹ ויקחו את כיתנת יוסף וישחטו שעיר עזים ויטבלו את הכיתנת בדם ³² וישלחו את כיתנת הפסים ויביאוה אל אביהם ויאמרו זאת מצאנו הכר נא הכיתנת בנך היא אם לא ³³ ויכרה ויאמר כיתנת בני היא חיה רעה אכלתו טרף טרף יוסף ³⁴ ויקרע יעקב שמלתיו וישם שק במתניו ויתאבל על בנו ימים רבים ³⁵ ויקמו כל בניו וכל בנתיו לנחמו וימאן להתנחם ויאמר כי ארד על בני אבל שאלה ויבך אתו אביו ³⁶ והמדינים מכרו את יוסף מצרימה לפוטיפר סריס פרעה שר הטבחים