Génesis 38

¹ ויהי בעת ההיא וירד יהודה מאת אחיו ויט עד איש עדלמי ושמו חירה ² וירא שם יהודה בת איש כנעני ושמו שוע ויקחה ויבא אליה ³ ותהר ותלד בן ותקרא את שמו ער ⁴ ותהר עוד ותלד בן ותקרא את שמו אונן ⁵ ותסף עוד ותלד בן ותקרא את שמו שלה ויהי בכזבה בלדתה אתו ⁶ ויקח יהודה אשה לער בכרו ושמה תמר ⁷ ויהי ער בכור יהודה רע בעיני יהוה וימתהו יהוה ⁸ ויאמר יהודה לאונן בא אל אשת אחיך ויבם אתה והקם זרע לאחיך ⁹ וידע אונן כי לא לו יהיה הזרע והיה אם בא אל אשת אחיו ושחת ארצה לבלתי נתן זרע לאחיו ¹⁰ וירע בעיני יהוה את אשר עשה וימת גם אתו ¹¹ ויאמר יהודה לתמר כלתו שבי אלמנה בית אביך עד יגדל שלה בני כי אמר פן ימות גם הוא כאחיו ותלך תמר ותשב בית אביה ¹² וירבו הימים ותמת בת שוע אשת יהודה וינחם יהודה ויעל . לגזזי צאנו הוא וחירה רעהו העדלמי תמנתה ¹³ ויגד לתמר כלתו לאמר הנה חמיך עלה תמנתה לגז צאנו ¹⁴ ותסר בגדי אלמנותה מעליה ותתכס בצעיף ותתעלף ותשב בפתח עינים אשר על דרך תמנתה כי ראתה כי גדל שלה והיא לא נתנה לו לאשה ¹⁵ ויראה יהודה ויחשבה לזונה כי כסתה פניה ¹⁶ ויט אליה אל הדרך ויאמר הבה נא אבוא אליך כי לא ידע כי כלתו היא ותאמר מה תתן לי כי תבוא אלי ¹⁷ ויאמר אנכי אשלח גדי עזים מן הצאן ותאמר אם תתן ערבון עד שלחך ¹⁸ ויאמר מה הערבון אשר אתן לך ותאמר חתימך ופתילך ומטך אשר בידך ויתן לה ויבא אליה ותהר לו ¹⁹ ותקם ותלך ותסר צעיפה מעליה ותלבש בגדי אלמנותה ²⁰ וישלח יהודה את גדי העזים ביד רעהו העדלמי לקחת הערבון מיד האשה ולא מצאה ²¹ וישאל את אנשי המקום לאמר איה הקדשה ההיא בעינים על הדרך ויאמרו לא היתה בזה קדשה ²² וישב אל יהודה ויאמר לא מצאתיה וגם אנשי המקום אמרו לא היתה בזה קדשה ²³ ויאמר יהודה תקח לה פן נהיה לבוז הנה שלחתי את הגדי הזה ואתה לא מצאתה ²⁴ ויהי כמשלשת חדשים ויגד ליהודה לאמר זנתה תמר כלתך וגם הנה הרה לזנים ויאמר יהודה הוציאוה ותשרף ²⁵ היא מוצאת והיא שלחה אל חמיה לאמר לאיש אשר אלה לו אנכי הרה ותאמר הכר נא למי החתים והפתיל והמטה האלה ²⁶ ויכר יהודה ויאמר צדקה ממני כי על כן לא נתתיה לשלה בני ולא יסף עוד לדעתה ²⁷ ויהי בעת לדתה והנה תאמים בבטנה ²⁸ ויהי בלדתה ויתן יד ותקח המילדת ותקשר על ידו שני לאמר זה יצא ראישון ²⁹ ויהי כמשיב ידו והנה יצא אחיו ותאמר מה פרצת עלינו פרץ ותקרא את שמו פרץ ³⁰ ואחרי כן יצא אחיו אשר על ידו השני ותקרא שמו זרח