Levítico 23

¹ וידבר יהוה אל משה לאמר ² דבר אל בני ישראל ואמרת אליהם מועדי יהוה אשר תקראו אתם מקראי קדש אלה הם מועדי ³ ששת ימים יעשה מלאכה וביום השביעי שבת שבתון מקרא קדש כל מלאכה לא תעשו שבת היא ליהוה בכל מושבתיכם ⁴ ואלה מועדי יהוה מקראי קדש אשר תקראו אתם במועדם ⁵ בחדש הראישון בארבעה עשר יום לחדש בין הערבים פסח ליהוה ⁶ ובחמשה עשר יום לחדש הזה חג המצות ליהוה שבעת ימים מצות תאכלו ⁷ ביום הראישון מקרא קדש יהיה לכם כל מלאכת עבדה לא תעשו ⁸ והקרבתם אשה ליהוה שבעת ימים וביום השביעי מקרא קדש כל מלאכת עבדה לא תעשו ⁹ וידבר יהוה אל משה לאמר ¹⁰ דבר אל בני ישראל ואמרת אליהם כי תבאו אל הארץ אשר אני נתן לכם וקצרתם את קצירה והבאתם את העמר ראשית קצירכם אל הכהן ¹¹ והניף את העמר לפני יהוה לרצונכם ממחרת השבת יניפנו הכהן ¹² ועשיתם ביום הנפכם את העמר כבש תמים בן שנתו לעלה ליהוה ¹³ ומנחתו שני עשרנים סלת בלולה בשמן אשה ליהוה ריח ניחח ונסכו יין רבעית ההין ¹⁴ ולחם וקלי וכרמל לא תאכלו עד עצם היום הזה עד הבאכם את קרבן אלהיכם חקת עולם לדרתיכם בכל מושבתיכם ¹⁵ וספרתם לכם ממחרת השבת מיום הבאכם את עמר התנופה שבע שבתות תמימות תהיינה ¹⁶ עד ממחרת השבת השביעת תספרו חמשים יום והקרבתם מנחה חדשה ליהוה ¹⁷ ממושבתיכם תביאו לחם תנופה שתים חלות שני עשרנים סלת תהיינה חמץ תאפינה בכרים ליהוה ¹⁸ והקרבתם על הלחם שבעה כבשים תמימם בני שנה ופר בן בקר אחד ואילים שנים תמימם יהיו עלה ליהוה ומנחתם ונסכיהם אשה ריח ניחח ליהוה ¹⁹ ועשיתם שעיר עזים אחד לחטאת ושני כבשים בני שנה לזבח השלמים ²⁰ והניף הכהן אתם על לחם הבכרים תנופה לפני יהוה על שני הכבשים קדש יהיו ליהוה לכהן ²¹ וקראתם בעצם היום הזה מקרא קדש יהיה לכם כל מלאכת עבדה לא תעשו חקת עולם בכל מושבתיכם לדרתיכם ²² ובקצירכם את קציר ארצכם לא תכלה פאת שדך לקצר ולקט קצירך לא תלקט לעני ולגר תעזב אתם אני יהוה אלהיכם ²³ וידבר יהוה אל משה לאמר ²⁴ דבר אל בני ישראל לאמר בחדש השביעי באחד לחדש יהיה לכם שבתון זכרון תרועה מקרא קדש ²⁵ כל מלאכת עבדה לא תעשו והקרבתם אשה ליהוה ²⁶ וידבר יהוה אל משה לאמר ²⁷ אך בעשור לחדש השביעי הזה יום כפרים הוא מקרא קדש יהיה לכם ועניתם את נפשתיכם והקרבתם אשה ליהוה ²⁸ וכל מלאכה לא תעשו בעצם היום הזה כי יום כפרים הוא לכפר עליכם לפני יהוה אלהיכם ²⁹ כי כל הנפש אשר לא תענה בעצם היום הזה ונכרתה מעמיה ³⁰ וכל הנפש אשר תעשה כל מלאכה בעצם היום הזה והאבדתי את הנפש ההיא מקרב עמיה ³¹ וכל מלאכה לא תעשו חקת עולם לדרתיכם בכל מושבתיכם ³² שבת שבתון הוא לכם ועניתם את נפשתיכם בתשעה לחדש בערב מערב עד ערב תשביתו שבתכם ³³ וידבר יהוה אל משה לאמר ³⁴ דבר אל בני ישראל לאמר בחמשה עשר יום לחדש השביעי הזה חג הסכות שבעת ימים ליהוה ³⁵ ביום הראישון מקרא קדש כל מלאכת עבדה לא תעשו ³⁶ שבעת ימים תקריבו אשה ליהוה ביום השמיני מקרא קדש יהיה לכם והקרבתם אשה ליהוה עצרת היא וכל מלאכת עבדה לא תעשו ³⁷ אלה מועדי יהוה אשר תקראו אתם מקראי קדש להקריב אשה ליהוה עלה ומנחה זבח ונסכים דבר יום ביומו ³⁸ מלבד שבתות יהוה ומלבד כל מתנתיכם ומלבד כל נדריכם ומלבד כל נדבתיכם אשר תתנו ליהוה ³⁹ אך בחמשה עשר יום לחדש השביעי באספכם את תבואת הארץ תחגו את חג יהוה שבעת ימים ביום הראישון שבתון וביום השמיני שבתון ⁴⁰ ולקחתם לכם ביום הראישון פרי עץ הדר כפות תמרים וענפי עץ עבות וערבי נחל ושמחתם לפני יהוה אלהיכם שבעת ימים ⁴¹ וחגתם אתו חג ליהוה שבעת ימים בשנה חקת עולם לדרתיכם בחדש השביעי תחגו אתו ⁴² בסכות תשבו שבעת ימים כל האזרח בישראל ישב בסכות ⁴³ למען ידעו דרתיכם כי בסכות הושבתי את בני ישראל בהוצאי אתם מארץ מצרים אני יהוה אלהיכם ⁴⁴ וידבר משה את מועדי יהוה אל בני ישראל