Levítico 22

¹ וידבר יהוה אל משה לאמר ² דבר אל אהרן ואל בניו וינזרו מקדשי בני ישראל ולא יחללו את שם קדשי אשר הם מקדשים לי אני יהוה ³ אמר אליהם לדרתיכם כל איש אשר יקרב מכל זרעכם אל הקדשים אשר יקדישו בני ישראל ליהוה וטמאתו עליו ונכרתה הנפש ההיא מלפני אני יהוה ⁴ איש איש מזרע אהרן והוא צרוע או זב בקדשים לא יאכל עד אשר יטהר והנגע בכל טמא נפש או איש אשר תצא ממנו שכבת זרע ⁵ או איש אשר יגע בכל שרץ טמא אשר יטמא לו או באדם אשר יטמא לו לכל טמאתו ⁶ נפש אשר תגע בו וטמא עד הערב ולא יאכל מן הקדשים כי אם רחץ בשרו במים ⁷ ובא השמש וטהר ואחר יאכל מן הקדשים כי לחמו הוא ⁸ נבלה וטרפה לא יאכלו לטמאה בה אני יהוה ⁹ ושמרו את משמרתי ולא ישאו עליו חטא ומתו בו כי יחללהו אני יהוה מקדשם ¹⁰ וכל זר לא יאכל קדש תושב כהן ושכיר לא יאכל קדש ¹¹ וכהן כי יקנה נפש קנין כספו הוא יאכל בו וילדי ביתו הם יאכלו בלחמו ¹² ובת כהן כי תהיה לאיש זר היא בתרומת הקדשים לא תאכל ¹³ ובת כהן כי תהיה אלמנה וגרושה וזרע אין לה ושבה אל בית אביה כנעריה מלחם אביה תאכל וכל זר לא יאכל בו ¹⁴ ואיש כי יאכל קדש בשגגה ויסף חמישתו עליו ונתן לכהן את הקדש ¹⁵ ולא יחללו את קדשי בני ישראל . אשר ירימו ליהוה ¹⁶ והשיאו אתם עון אשמה באכלם את קדשיהם כי אני יהוה מקדשם ¹⁷ וידבר יהוה אל משה לאמר ¹⁸ דבר אל אהרן ואל בניו ואל כל בני ישראל ואמרת אליהם איש איש מבית ישראל ומן הגר הגר בישראל אשר יקריב קרבנו לכל נדריהם . ולכל נדבתם אשר יקריבו ליהוה לעלה ¹⁹ לרצונכם תמים זכר בבקר בכשבים ובעזים ²⁰ כל אשר בו מום לא תקריבו כי לא לרצון יהיה לכם ²¹ ואיש כי יקריב זבח שלמים ליהוה לפלא נדר או נדבה בבקר או . בצאן תמים יהיה לרצון וכל מום לא יהיה בו ²² עורת או שבור או חרוץ או יבלת או גרב או ילפת . . . לא תקריבו אלה ליהוה ואשה לא תתנו מהם על המזבח ליהוה ²³ ושור ושה שרוע וקלוט נדבה תעשו אתו ולנדר לא ירצה ²⁴ מעוך וכתות ונתוק וכרות לא תקריבו . ליהוה ובארצכם לא תעשו ²⁵ ומיד בן נכר לא תקריבו את לחם אלהיכם מכל אלה כי משחתים בהם מום בם לא ירצו לכם ²⁶ וידבר יהוה אל משה לאמר ²⁷ שור או כשב או עז כי יולד והיה שבעת ימים תחת אמו ומיום השמיני והלאה ירצה לקרבן אשה ליהוה ²⁸ ושור . ושה אתו ואת בנו לא תשחטו ביום אחד ²⁹ וכי תזבחו זבח תודה ליהוה לרצונכם תזבחהו ³⁰ ביום ההוא יאכל לא תותירו ממנו עד בקר אני יהוה ³¹ ושמרתם את מצותי ועשיתם אתם . . ³² ולא תחללו את שם קדשי ונקדשתי בתוך בני ישראל אני יהוה מקדשם ³³ המוצא אתכם מארץ מצרים להיות לכם לאלהים אני יהוה