Levítico 27

¹ וידבר יהוה אל משה לאמר ² דבר אל בני ישראל ואמרת אליהם איש כי יפלא נדר בערכך נפשות ליהוה ³ והיה ערכך הזכר מבן עשרים שנה ועד בן ששים שנה והיה ערכך חמשים שקל כסף בשקל הקדש ⁴ ואם נקבה היא והיה ערכך שלשים שקל ⁵ ואם מבן חמש שנים ועד בן עשרים שנה והיה ערכך הזכר עשרים שקלים ולנקבה עשרת שקלים ⁶ ואם מבן חדש ועד בן חמש שנים והיה ערכך הזכר חמשה שקלים כסף ולנקבה ערכך שלשת שקלים כסף ⁷ ואם מבן ששים שנה ומעלה אם זכר והיה ערכך חמשה עשר שקל ולנקבה עשרה שקלים ⁸ ואם מך הוא מערכך והעמידו לפני הכהן והעריך אתו הכהן על פי אשר תשיג יד הנדר יעריכנו הכהן ⁹ ואם בהמה אשר יקריב ממנה קרבן ליהוה כל אשר יתן ממנו ליהוה יהיה קדש ¹⁰ לא יחליפנו ולא ימיר אתו טוב ברע או רע בטוב ואם המר ימיר בהמה בבהמה והיה הוא ותמירתו יהיה קדש ¹¹ ואם כל בהמה טמאה אשר לא יקריב ממנה קרבן ליהוה והעמיד את הבהמה לפני הכהן ¹² והעריך הכהן אתו בין טוב ובין רע כערכך הכהן כן יהיה ¹³ ואם גאל יגאלנו ויסף חמישתו על ערכך ¹⁴ ואיש כי יקדש את ביתו קדש ליהוה והעריכו הכהן בין טוב ובין רע כאשר יעריך אתו הכהן כן יקום ¹⁵ ואם המקדש יגאל את ביתו ויסף חמישת כסף ערכך עליו והיה לו ¹⁶ ואם משדה אחזתו יקדש איש ליהוה והיה ערכך לפי זרעו זרע חמר שערים בחמשים שקל כסף ¹⁷ ואם משנת היובל יקדש שדהו כערכך יקום ¹⁸ ואם אחר היובל יקדיש שדהו וחשב לו הכהן את הכסף על פי השנים הנותרת עד שנת היובל ונגרע מערכך ¹⁹ ואם גאל יגאל את השדה המקדש אתו ויסף חמישת כסף ערכך עליו וקם לו ואם ²⁰ לא יגאל את השדה ואם מכר את השדה לאיש אחר לא יגאל עוד והיה ²¹ השדה בצאתו ביובל קדש ליהוה כשדה החרם לכהן תהיה אחזתו ואם ²² את שדה מקנתו אשר לא משדה אחזתו יקדיש ליהוה וחשב ²³ לו הכהן את מכסות הערכך עד שנת היובל ונתן את הערכך ביום ההוא קדש ליהוה בשנת ²⁴ היובל ישוב השדה לאשר קנהו מאתו לאשר לו אחזת הארץ וכל ²⁵ ערכך יהיה בשקל הקדש עשרים גרה . השקל ²⁶ אך כל בכור אשר יבכר ליהוה בבהמה לא יקדיש איש אתו אם שור אם שה ליהוה הוא ²⁷ ואם בבהמה הטמאה ופדה בערכך ויסף חמישתו עליו ואם לא יגאל ונמכר בערכך ²⁸ אך כל חרם אשר יחרם איש ליהוה מכל אשר לו מאדם ובהמה ומשדה אחזתו לא ימכר ולא יגאל כל חרם קדש קדשים הוא ליהוה ²⁹ כל חרם אשר יחרם מן האדם לא יפדה מות יומת ³⁰ וכל מעשר הארץ מזרע הארץ ומפרי העץ ליהוה הוא קדש ליהוה ³¹ ואם גאל יגאל איש ממעשרו חמשיתו יסף עליו ³² וכל מעשר בקר וצאן כל אשר יעבר תחת השבט העשירי יהיה קדש ליהוה ³³ לא יבקר בין טוב לרע ולא ימירנו ואם המר ימירנו והיה הוא ותמירתו יהיה קדש לא יגאל ³⁴ אלה המצות אשר צוה יהוה את משה אל בני ישראל בהר סיני