Números 2

¹ וידבר יהוה אל משה ואל אהרן לאמר ² איש על דגליו באתות לבית אבתם יחנו בני ישראל מנגד סביב לאהל מועד יחנו ³ והחנים קדמה מזרחה דגל מחנה יהודה לצבאתם ונשיא לבני יהודה נחשון בן עמינדב ⁴ וצבאו ופקדיו ארבעה ושבעים אלף ושש מאות ⁵ והחנים עליו מטה יששכר ונשיא לבני יששכר נתנאל בן צוער ⁶ וצבאו ופקדיו ארבעה וחמשים אלף וארבע מאות ⁷ ומטה זבולן ונשיא לבני זבולן אליאב בן חילן ⁸ וצבאו ופקדיו שבעה וחמשים אלף וארבע מאות ⁹ כל הפקדים למחנה יהודה מאת אלף ושמנים אלף וששת אלפים וארבע מאות לצבאתם ראישונה יסעו ¹⁰ דגל מחנה ראובן תימנה לצבאתם ונשיא לבני ראובן אליצור בן שדיאור ¹¹ וצבאו ופקדיו ששה וארבעים אלף וחמש מאות ¹² והחנים עליו מטה שמעון ונשיא לבני שמעון שלמיאל בן צורישדי ¹³ וצבאו ופקדיו תשעה וחמשים אלף ושלש מאות ¹⁴ ומטה גד ונשיא לבני גד אליסף בן רעואל ¹⁵ וצבאו ופקדיו חמשה וארבעים אלף ושש מאות וחמשים ¹⁶ כל הפקדים למחנה ראובן מאת אלף ואחד וחמשים אלף וארבע מאות וחמשים לצבאתם ושנים יסעו ¹⁷ ונסע אהל מועד מחנה הלוים בתוך המחנות כאשר יחנו כן יסעו איש על ידו לדגליהם ¹⁸ דגל מחנה אפרים לצבאתם ימה ונשיא לבני אפרים אלישמע בן עמיהוד ¹⁹ וצבאו ופקדיו ארבעים אלף וחמש מאות ²⁰ ועליו מטה מנשה ונשיא לבני מנשה גמליאל בן פדהצור ²¹ וצבאו ופקדיו שנים ושלשים אלף ומאתים ²² ומטה בנימים ונשיא לבני בנימים אבידן בן גדעני ²³ וצבאו ופקדיו חמשה ושלשים אלף וארבע מאות ²⁴ כל הפקדים למחנה אפרים מאת אלף ושמנת אלפים ומאה לצבאתם ושלשים יסעו ²⁵ דגל מחנה דן צפונה לצבאתם ונשיא לבני דן אחיעזר בן עמישדי ²⁶ וצבאו ופקדיו שנים וששים אלף ושבע מאות ²⁷ והחנים עליו מטה אשר ונשיא לבני אשר פגעיאל בן עכרן ²⁸ וצבאו ופקדיו אחד וארבעים אלף וחמש מאות ²⁹ ומטה נפתלי ונשיא לבני נפתלי אחירע בן עינן ³⁰ וצבאו ופקדיו שלשה וחמשים אלף וארבע מאות ³¹ כל הפקדים למחנה דן מאת אלף ושבעה וחמשים אלף ושש מאות לאחרנה יסעו לדגליהם ³² אלה פקדי בני ישראל לבית אבתם כל פקדי המחנות לצבאתם שש מאות אלף ושלשת אלפים וחמש מאות וחמשים ³³ והלוים לא התפקדו בתוך בני ישראל כאשר צוה יהוה את משה ³⁴ ויעשו בני ישראל ככל אשר צוה יהוה את משה כן חנו לדגליהם וכן נסעו איש למשפחתיו על בית אבתיו