Números 3

¹ ואלה תולדת אהרן ומשה ביום דבר יהוה את משה בהר סיני ² ואלה שמות בני אהרן הבכור נדב ואביהוא אלעזר ואיתמר ³ אלה שמות בני אהרן הכהנים המשחים אשר מלא ידם לכהן ⁴ וימת נדב ואביהוא . . בהקרבם אש זרה לפני יהוה במדבר סיני ובנים לא היו להם ויכהן אלעזר ואיתמר על פני אהרן אביהם ⁵ וידבר יהוה אל משה לאמר ⁶ הקרב את מטה לוי והעמדת אתו לפני אהרן הכהן ושרתו אתו ⁷ ושמרו את משמרתו ואת משמרת כל העדה לפני אהל מועד לעבד את עבדת המשכן ⁸ ושמרו את כל כלי אהל מועד ואת משמרת בני ישראל לעבד את עבדת המשכן ⁹ ונתתה את הלוים לאהרן ולבניו נתנים נתנים הם לי מתוך בני ישראל ¹⁰ ואת אהרן ואת בניו תפקד ושמרו את כהנתם והזר הקרב יומת ¹¹ וידבר יהוה אל משה לאמר ¹² ואני הנה לקחתי את הלוים מתוך בני ישראל תחת כל בכור פטר רחם מבני ישראל פדוייהם יהיו והיו לי הלוים ¹³ כי לי כל בכור ביום הכיתי כל בכור בארץ מצרים הקדשתי לי כל בכור בישראל מאדם עד בהמה לי יהיו אני יהוה ¹⁴ וידבר יהוה אל משה במדבר סיני לאמר ¹⁵ פקד את בני לוי לבית אבתם למשפחותם כל זכר מבן חדש ומעלה תפקדם ¹⁶ ויפקד אתם משה על פי יהוה כאשר צוהו ¹⁷ ויהיו אלה בני לוי בשמותם גרשון קהת ומררי ¹⁸ ואלה שמות בני גרשון למשפחותם לבני ושמעי ¹⁹ ובני קהת למשפחותם עמרם ויצהר חברון ועזיאל ²⁰ ובני מררי למשפחותם מחלי ומושי אלה הם משפחות הלוי לבית אבתם ²¹ לגרשון משפחת הלבני ומשפחת השמעי אלה הם משפחת הגרשוני ²² פקדיהם במספר כל זכר מבן חדש ומעלה פקדיהם שבעת אלפים וחמש מאות ²³ משפחת הגרשוני אחרי המשכן יחנו ימה ²⁴ ונשיא בית אב לגרשוני אליסף בן לאל ²⁵ ומשמרת בני גרשון באהל מועד המשכן והאהל ומכסהו ומסך פתח אהל מועד ²⁶ וקלעי החצר ואת מסך פתח החצר אשר על המשכן ועל המזבח סביב ואת מיתריו לכל עבדתו ²⁷ ולקהת משפחת העמרמי ומשפחת היצהרי ומשפחת החברוני ומשפחת העזיאלי אלה הם משפחת הקהתי ²⁸ במספר כל זכר מבן חדש ומעלה שמנת אלפים ושש מאות שמרי משמרת הקדש ²⁹ משפחת בני קהת יחנו על ירך המשכן תימנה ³⁰ ונשיא בית אב למשפחת הקהתי אליצפן בן עזיאל ³¹ ומשמרתם הארון והשלחן והמנורה והמזבחות וכלי הקדש אשר ישרתו בהם והמסך וכל עבדתם ³² ונשיא נשיאי הלוים אלעזר בן אהרן הכהן פקדת שמרי משמרת הקדש ³³ למררי משפחת המחלי ומשפחת המושי אלה הם משפחת מררי ³⁴ ופקדיהם במספר כל זכר מבן חדש ומעלה ששת אלפים ומאתים ³⁵ ונשיא בית אב למשפחת מררי צוריאל בן אביחיל על ירך המשכן יחנו צפונה ³⁶ ופקדת משמרת בני מררי קרשי המשכן ובריחיו ועמדיו ואדניו וכל כליו וכל עבדתו ³⁷ ועמודי החצר סביב ואדניהם ויתדתם ומיתריהם ³⁸ והחנים את פני המשכן קדמה לפני אהל מועד מזרחה משה אהרן ובניו שמרי משמרת הקדש למשמרת בני ישראל והזר הקרב יומת ³⁹ כל פקדי הלוים אשר פקד משה . על פי יהוה למשפחותם כל זכר מבן חדש ומעלה שנים ועשרים אלף ⁴⁰ ויאמר יהוה אל משה פקד כל בכור זכר לבני ישראל מבן חדש ומעלה ושא את מספר שמותם ⁴¹ ולקחת את הלוים לי אני יהוה תחת כל בכור בבני ישראל ואת בהמת הלוים תחת כל בכור בבהמת בני ישראל ⁴² ויפקד משה כאשר צוה יהוה אתו את כל בכור בבני ישראל ⁴³ ויהיו כל בכור זכר במספר שמות מבן חדש ומעלה לפקדיהם שנים ועשרים אלף שלשה ושבעים ומאתים ⁴⁴ וידבר יהוה אל משה לאמר ⁴⁵ קח את הלוים תחת כל בכור בבני ישראל ואת בהמת הלוים תחת בהמתם והיו לי הלוים אני יהוה ⁴⁶ ואת פדויי השלשה והשבעים והמאתים העדפים על הלוים מבכורי בני ישראל ⁴⁷ ולקחת חמשת חמשת שקלים לגלגלת בשקל הקדש תקח עשרים גרה השקל ⁴⁸ ונתתה הכסף לאהרן ולבניו פדויי העדפים בהם ⁴⁹ ויקח משה את כסף הפדוים מאת העדפים על פדויי הלוים ⁵⁰ מאת בכורי בני ישראל לקח את הכסף חמשה וששים ושלש מאות ואלף בשקל הקדש ⁵¹ ויתן משה את כסף הפדוים לאהרן ולבניו על פי יהוה כאשר צוה יהוה את משה