Números 32

¹ ומקנה רב היה לבני ראובן ולבני גד ולחצי שבט המנשה עצום מאד ויראו את ארץ יעזר ואת ארץ גלעד והנה המקום מקום מקנה ² ויבאו בני גד ובני ראובן וחצי שבט המנשה ויאמרו אל משה ואל אלעזר הכהן ואל נשיאי העדה לאמר ³ עטרות ודיבון ויעזר ונמרה וחשבון ואלעלה ושבמה ונבו ובעון ⁴ הארץ אשר הכה יהוה לפני עדת ישראל ארץ מקנה היא ולעבדיך מקנה ⁵ ויאמרו אם מצאנו חן בעיניך יתן את הארץ הזאת לעבדיך לאחזה ואל תעברנו את הירדן ⁶ ויאמר משה לבני ראובן ולבני גד ולחצי שבט המנשה האחיכם יבאו למלחמה ואתם תשבו פה ⁷ ולמה תניאון את לב בני ישראל מעבר אל הארץ אשר נתן להם יהוה ⁸ כה עשו אבתיכם בשלחי אתם מקדש ברנע לראות את הארץ ⁹ ויעלו עד נחל אשכול ויראו את הארץ ויניאו את לב בני ישראל לבלתי בא אל הארץ אשר נתן להם יהוה ¹⁰ ויחר אף יהוה ביום ההוא וישבע לאמר ¹¹ אם יראו האנשים העלים ממצרים מבן עשרים שנה ומעלה את האדמה אשר נשבעתי לאברהם ליצחק וליעקב כי לא מלאו אחרי ¹² בלתי כלב בן יפנה הקנזי ויהושע בן נון כי מלאו אחרי יהוה ¹³ ויחר אף יהוה בישראל וינעם במדבר ארבעים שנה עד תם כל הדור העשה הרע בעיני יהוה ¹⁴ והנה קמתם תחת אבתיכם תרבות אנשים חטאים לספות עוד על חרון אף יהוה על ישראל ¹⁵ כי תשובון מאחריו ויסף עוד להניחו במדבר ושחתם לכל העם הזה ¹⁶ ויגשו אליו ויאמרו גדרות צאן נבנה למקנינו פה וערים לטפנו ¹⁷ ואנחנו נחלץ חשים לפני בני ישראל עד אשר אם הביאנם אל מקומם וישב טפנו בערי המבצר מפני ישבי הארץ ¹⁸ לא נשוב אל בתינו עד התנחלו בני ישראל איש את נחלתו ¹⁹ כי לא ננחל אתם מעבר לירדן והלאה כי באה נחלתנו אלינו מעבר לירדן מזרחה ²⁰ ויאמר אליהם משה אם תעשון את הדבר הזה אם תחלצו לפני יהוה למלחמה ²¹ ועבר לכם כל חלוץ את הירדן לפני יהוה עד הורישו את איביו מפניו ²² ונכבשה הארץ לפני יהוה ואחר תשובון והייתם נקוים מיהוה ומישראל והיתה הארץ הזאת לכם לאחזה לפני יהוה ²³ ואם לא תעשון כן הנה חטאתם ליהוה ודעו חטאתיכם אשר תמצא אתכם ²⁴ בנו לכם ערים לטפכם וגדרות לצאנכם והיוצא מפיכם תעשון ²⁵ ויאמרו בני . . ראובן ובני גד וחצי שבט המנשה אל משה לאמר עבדיך יעשו כאשר אדני מצוה ²⁶ טפנו ונשינו ומקנינו וכל בהמתנו יהיו שם בערי הגלעד ²⁷ ועבדיך יעברו כל חלוץ צבא לפני יהוה למלחמה כאשר אדני דבר ²⁸ ויצו להם משה את אלעזר . . הכהן ואת יהושע בן נון ואת ראשי אבות המטות לבני ישראל ²⁹ ויאמר משה אליהם אם יעברו בני ראובן ובני גד וחצי שבט המנשה אתכם את הירדן כל חלוץ למלחמה לפני יהוה ונכבשה הארץ לפניכם ונתתם להם את ארץ הגלעד לאחזה ³⁰ ואם לא יעברו חלוצים אתכם . . . . . . . . . ונאחזו בתוככם . . בארץ כנען . ³¹ ויענו בני ראובן ובני גד וחצי שבט המנשה לאמר את אשר דבר יהוה אל עבדיך כן נעשה ³² אנחנו נעבר חלוצים לפני יהוה ארץ כנען ואתנו אחזת נחלתנו מעבר לירדן ³³ ויתן להם משה לבני ראובן ולבני גד ולחצי שבט המנשה בן יוסף את ממלכת סיחון מלך האמרי ואת ממלכת עוג מלך הבשן ארץ לעריה בגבולת ערי הארץ סביב ³⁴ ויבנו בני גד את דיבון ואת עטרות ואת ערער ³⁵ ואת עטרות שפים ואת יעזר ויגבהה ³⁶ ואת בית נמרה ואת בית הרן ערי מבצר וגדרות צאן ³⁷ ובני ראובן בנו את חשבון ואת אלעלה ואת קריתים ³⁸ ואת נבו ואת בעל מעון מוסבת שם ואת שבמה ויקראו בשמות את שמות הערים אשר בנו ³⁹ וילכו בני מכיר בן מנשה . . גלעדה וילכדוה ויורישו את האמרי אשר בה ⁴⁰ ויתן משה את הגלעד למכיר בן מנשה וישב בה ⁴¹ ויאיר בן מנשה הלך וילכד את חותים ויקרא אתהן חות יאיר ⁴² ונבח הלך וילכד את קנת ואת בנתיה ויקרא לה נבח בשמו