Números 33

¹ אלה מסעי בני ישראל אשר יצאו מארץ מצרים לצבאתם ביד משה ואהרן ² ויכתב משה את מוצאיהם למסעיהם על פי יהוה ואלה מסעיהם למוצאיהם ³ ויסעו מרעמסס בחדש הראישון בחמשה עשר יום לחדש הראישון ממחרת הפסח יצאו בני ישראל ביד רמה לעיני כל מצרים ⁴ ומצרים מקברים את אשר הכה יהוה בהם כל בכור ובאלהיהם עשה יהוה שפטים ⁵ ויסעו בני ישראל מרעמסס ויחנו בסכות ⁶ ויסעו מסכות ויחנו באתם אשר בקצה המדבר ⁷ ויסעו מאתם וישבו על פי החירת אשר על פני בעל צפון ויחנו לפני מגדל ⁸ ויסעו מפי החירת ויעברו בתוך הים המדברה וילכו דרך שלשת ימים במדבר אתם ויחנו במרה ⁹ ויסעו ממרה ויבאו אילים ובאילים שתים עשרה עינות מים ושבעים תמרים ויחנו שם ¹⁰ ויסעו מאילים ויחנו על ים סוף ¹¹ ויסעו מים סוף ויחנו במדבר סין ¹² ויסעו ממדבר סין ויחנו בדפקה ¹³ ויסעו מדפקה ויחנו באליש ¹⁴ ויסעו מאליש ויחנו ברפדים ולא היה שם מים לעם לשתות ¹⁵ ויסעו מרפדים ויחנו במדבר סיני ¹⁶ ויסעו ממדבר סיני ויחנו בקברות התאוה ¹⁷ ויסעו מקברות התאוה ויחנו בחצרות ¹⁸ ויסעו מחצרות ויחנו ברתמה ¹⁹ ויסעו מרתמה ויחנו ברמון פרץ ²⁰ ויסעו מרמון פרץ ויחנו בלבונה ²¹ ויסעו מלבונה ויחנו ברסה ²² ויסעו מרסה ויחנו בקהלתה ²³ ויסעו מקהלתה ויחנו בהר שפר ויסעו מהר שפר ²⁴ 0 ²⁵ ויחנו בחרדה ויסעו מחרדה ויחנו במקהלת ²⁶ ויסעו ממקהלת ויחנו בתחת ²⁷ ויסעו מתחת ויחנו בתרח ²⁸ ויסעו מתרח ויחנו במתקה ²⁹ ויסעו ממתקה ויחנו בחשמונה ³⁰ ויסעו מחשמונה ויחנו במסרות ³¹ ויסעו ממסרות ויחנו בבני יעקן ³² ויסעו מבני יעקן ויחנו בחר הגדגדה ³³ ויסעו מחר הגדגדה ויחנו ביטבתה ³⁴ ויסעו מיטבתה ויחנו בעברנה ³⁵ ויסעו מעברנה ויחנו בעציון גבר ³⁶ ויסעו מעציון גבר ויחנו במדבר צן היא קדש ³⁷ ויסעו מקדש ויחנו בהר ההר בקצה ארץ אדום ³⁸ ויעל אהרן הכהן אל הר ההר על פי יהוה וימת שם בשנת הארבעים לצאת בני ישראל מארץ מצרים בחדש החמישי באחד לחדש ³⁹ ואהרן בן שלש ועשרים ומאת שנה במותו בהר ההר ⁴⁰ וישמע הכנעני מלך ערד והוא ישב בנגב בארץ כנען בבוא בני ישראל ⁴¹ ויסעו מהר ההר ויחנו בצלמונה ⁴² ויסעו מצלמונה ויחנו בפינן ⁴³ ויסעו מפינן ויחנו באבות ⁴⁴ ויסעו מאבות ויחנו בעיי העברים בגבול מואב ⁴⁵ ויסעו מעיים ויחנו בדיבון גד ⁴⁶ ויסעו מדיבון גד ויחנו בעלמון דבלתימה ⁴⁷ ויסעו מעלמון דבלתימה ויחנו בהרי העברים לפני נבו ⁴⁸ ויסעו מהרי העברים ויחנו בערבת מואב על ירדן יריחו ⁴⁹ ויחנו על הירדן מבית הישמות עד אבל שטים בערבת מואב ⁵⁰ וידבר יהוה אל משה בערבת מואב על ירדן יריחו לאמר ⁵¹ דבר אל בני ישראל ואמרת אליהם כי אתם עברים את הירדן אל ארץ כנען ⁵² והורשתם את כל ישבי הארץ מפניכם ואבדתם את כל משכיתם ואת כל צלמי מסכותם תאבדו ואת כל במתם תשמידו ⁵³ והורשתם את הארץ וישבתם בה כי לכם נתתי את הארץ לרשת אתה ⁵⁴ והתנחלתם את הארץ בגורל למשפחתיכם לרב תרבה את נחלתו ולמעט תמעיט את נחלתו אל אשר יצא לו שם הגורל לו יהיה למטות אבתיכם תתנחלו ⁵⁵ ואם לא תורישו את ישבי הארץ מפניכם והיה אשר תותירו מהם לשכים בעיניכם ולצנים בצדיכם וצררו אתכם על הארץ אשר אתם ישבים בה ⁵⁶ והיה כאשר דמיתי לעשות להם כן אעשה לכם