Números 35

¹ וידבר יהוה אל משה בערבת מואב על ירדן יריחו לאמר ² צוי את בני ישראל ונתנו ללוים מנחלת אחזתם ערים לשבת ומגרש לערים סביבתיהם תתנו ללוים ³ והיו הערים . להם לשבת ומגרשיהן יהיו לבהמתם ולרכושם ולכל חיתם ⁴ ומגרשי הערים אשר תתנו ללוים מקיר העיר החוצה אלף אמה סביב ⁵ ומדתם מחוץ לעיר את פאת קדמה אלפים באמה ואת פאת נגבה אלפים באמה ואת פאת ימה אלפים באמה ואת פאת צפונה אלפים באמה והעיר בתוך זה יהיה לכם מגרשי הערים ⁶ ואת הערים אשר תתנו ללוים את שש ערי המקלט אשר תתנו לנוס שמה הרצח ועליהן תתנו ארבעים ושתים עיר ⁷ כל הערים אשר תתנו ללוים ארבעים ושמנה עיר אתהן ואת מגרשיהן ⁸ והערים אשר תתנו מאחזת בני ישראל מאת הרב תרבו ומאת המעט תמעיטו איש כפי נחלתו אשר ינחל יתן מעריו ללוים ⁹ וידבר יהוה אל משה לאמר ¹⁰ דבר אל בני ישראל ואמרת אליהם כי אתם עברים את הירדן אל ארץ כנען ¹¹ והקריתם לכם ערים ערי מקלט תהיינה לכם ונס שמה הרצח מכה נפש בשגגה ¹² והיו לכם הערים למקלט מגאל ולא ימות הרצח עד עמדו לפני העדה למשפט ¹³ והערים אשר תתנו שש ערי מקלט תהיינה לכם ¹⁴ את שלש הערים תתנו מעבר לירדן ואת שלש הערים תתנו בארץ כנען ערי מקלט תהיינה ¹⁵ לבני ישראל ולגר ולתושב בתוכם תהיינה שש הערים האלה למקלט לנוס שמה כל מכה נפש בשגגה ¹⁶ ואם בכלי ברזל הכהו וימת רצח הוא מות יומת הרצח ¹⁷ ואם באבן יד אשר ימות בה הכהו וימת רצח הוא מות יומת הרצח ¹⁸ ואם בכלי עץ יד אשר ימות בו הכהו וימת . . . רצח הוא מות יומת הרצח ¹⁹ גאל הדם הוא ימית את הרצח בפגעו בו הוא ימיתנו ²⁰ ואם בשנאה יהדפנו או השליך עליו . . בצדיה וימת ²¹ או באיבה הכהו בידו וימת מות יומת המכה רצח הוא . . . גאל הדם ימית את הרצח בפגעו בו ²² ואם בפתע בלא איבה הדיפו או השליך עליו כל כלי בלא צדיה ²³ או בכל אבן אשר ימות בה בלא ראות ויפל עליו וימת והוא לא אויב לו ולא מבקש רעתו ²⁴ ושפטו העדה בין המכה ובין גאל הדם על המשפטים האלה ²⁵ והצילו העדה את המכה מיד גאל הדם והשיבו אתו העדה אל עיר מקלטו אשר נס שמה וישב בה עד מות הכהן הגדול אשר משח אתו בשמן הקדש ²⁶ ואם יצא יצא הרצח את גבול עיר מקלטו אשר ינוס שמה ²⁷ ומצא אתו גאל הדם . . מחוץ לגבול עיר מקלטו ורצח גאל הדם את הרצח אין לו דם ²⁸ כי בעיר מקלטו ישב עד מות הכהן הגדול ואחרי מות הכהן הגדול ישוב הרצח אל ארץ אחזתו ²⁹ והיו אלה לכם לחקת משפט לדרתיכם בכל מושבתיכם ³⁰ כל מכה נפש לפי עדים ירצח את הרצח ועד אחד לא יענה בנפש למות ³¹ ולא תקחו כפר לנפש רצח אשר הוא רשע למות כי מות יומת ³² ולא תקחו כפר לנוס אל עיר מקלטו לשוב לשבת בארץ עד מות הכהן הגדול ³³ ולא תחניפו את הארץ אשר אתם ישבים בה כי הדם הוא יחניף את הארץ ולארץ לא יכפר לדם אשר שפך בה כי אם בדם שפכו ³⁴ ולא תטמאו את הארץ אשר אתם ישבים בה אשר אני שכן בתוכה כי אני יהוה שכן בתוך בני ישראל