Números 34

¹ וידבר יהוה אל משה לאמר ² צוי את בני ישראל ואמרת אליהם כי אתם באים אל ארץ כנען זאת הארץ אשר תפל לכם בנחלה ארץ כנען לגבלתיה ³ והיה לכם פאת נגבה ממדבר צן על ידי אדום והיה לכם גבול נגבה מקצה ים המלח קדמה ⁴ ונסב לכם הגבול מנגב למעלה עקרבים ועבר צנה והיה תוציאתו מנגב לקדש ברנע ויצא חצר אדר ועבר עצמונה ⁵ ונסב הגבול מעצמונה נחל מצרים והיה תוצאתו הים ⁶ וגבול ימה יהיה לכם הים הגדול יגבל זה יהיה לכם גבול ימה ⁷ וזה יהיה לכם גבול צפונה מן הים הגדול תתאו לכם הר ההר ⁸ ומהר ההר תתאו לבוא חמתה והיה תוצאתו הגבול צדדה ⁹ ויצא הגבול זפרנה והיה תוצאתו חצר עינן זה יהיה לכם גבול צפונה ¹⁰ והתאויתם לכם לגבול קדמה מחצר עינן שפמה ¹¹ וירד הגבול משפמה הרבלה מקדם לעין וירד הגבול ומחה אל כתף ים כנרת קדמה ¹² וירד הגבול הירדנה והיה תוצאתו ים המלח זאת תהיה לכם הארץ לגבלתיה סביב ¹³ ויצו משה את בני ישראל לאמר זאת הארץ אשר תתנחלו אתה בגורל אשר צוה יהוה לתת לתשעת המטות וחצי המטה ¹⁴ כי לקחו מטה בני הראובני לבית אבתם ומטה בני הגדי לבית אבתם וחצי מטה מנשה לקחו נחלתם ¹⁵ שני המטות וחצי המטה לקחו נחלתם מעבר לירדן יריחו קדמה מזרחה ¹⁶ וידבר יהוה אל משה לאמר ¹⁷ אלה שמות האנשים אשר ינחלו לכם את הארץ אלעזר הכהן ויהושע בן נון ¹⁸ ונשיא אחד נשיא אחד ממטה תקחו לנחל את הארץ ¹⁹ ואלה שמות האנשים למטה יהודה כלב בן יפנה ²⁰ למטה בני שמעון שמואל בן עמיהוד ²¹ למטה בנימים אלדד בן כסלן ²² למטה בני דן נשיא בקי בן יגלי ²³ לבני יוסף למטה בני מנשה נשיא חנאל בן אפוד ²⁴ למטה בני אפרים נשיא קמואל בן שפטן ²⁵ ולמטה בני זבולן נשיא אליצפן בן פרנך ²⁶ ולמטה בני יששכר נשיא פלטאל בן עזן ²⁷ ולמטה בני אשר נשיא אחיהוד בן שלמי ²⁸ ולמטה בני נפתלי נשיא פדהאל בן עמיהוד ²⁹ אלה אשר צוה יהוה לנחל את בני ישראל בארץ כנען