Génesis 24

¹ ואברהם זקן בא בימים ויהוה ברך את אברהם בכל ² ויאמר אברהם אל עבדו זקן ביתו המשל בכל אשר לו שים נא ידך תחת ירכי ³ ואשביעך ביהוה אלהי השמים ואלהי הארץ אשר לא תקח אשה לבני מבנות הכנעני אשר אנכי ישב בקרבו ⁴ כי אל ארצי ואל מולדתי תלך ולקחת אשה לבני ליצחק ⁵ ויאמר אליו העבד אולי לא תאבה האשה ללכת אחרי אל הארץ הזאת ההשב אשיב את בנך אל הארץ אשר יצאת משם ⁶ ויאמר אליו אברהם השמר לך פן תשיב את בני שמה ⁷ יהוה אלהי השמים אשר לקחני מבית אבי ומארץ מולדתי ואשר דבר לי ואשר נשבע לי לאמר לזרעך אתן את הארץ הזאת הוא ישלח מלאכו לפניך ולקחת אשה לבני משם ⁸ ואם לא תאבה האשה ללכת אחריך ונקית משבעתי זאת רק את בני לא תשיב שמה ⁹ וישם העבד את ידו תחת ירך אברהם אדניו וישבע לו על הדבר הזה ¹⁰ ויקח העבד עשרה גמלים מגמלי אדניו וילך וכל טוב אדניו בידו ויקם וילך אל ארם נהרים אל עיר נחור ¹¹ ויברך הגמלים מחוץ לעיר על באר המים לעת ערב לעת צאת השאבות ¹² ויאמר יהוה אלהי אדני אברהם הקרא נא לפני היום ועשה חסד עם אדני אברהם ¹³ הנה אנכי נצב על עין המים ובנות אנשי העיר יצאת לשאב מים ¹⁴ והיה הנערה אשר אמר אליה הטי נא כדך ואשתה ואמרה שתה וגם גמליך אשקה אתה הוכחת לעבדך ליצחק ובה אדע כי עשית חסד עם אדני אברהם ¹⁵ ויהי הוא טרם כלה לדבר אל לבו והנה רבקה יצאת אשר ילדה לבתואל בן מלכה אשת נחור אחי אברהם וכדה על שכמה ¹⁶ והנערה טובת מראה מאד בתולה ואיש לא ידעה ותרד העין ותמלא כדה ותעל ¹⁷ וירץ העבד לקראתה ויאמר הגמיני נא מעט מים מכדך ¹⁸ ותאמר שתה אדני ותמהר ותורד כדה על ידה ותשקהו ¹⁹ ותכל להשקתו ותאמר גם לגמליך אשאב עד אם כלו לשתות ²⁰ ותמהר ותורד כדה על השקות ותרץ עוד אל הבאר לשאב ותשאב לכל גמליו ²¹ והאיש משתה לה ומחריש לדעת ההצליח יהוה דרכו אם לא ²² ויהי כאשר כלו הגמלים לשתות ויקח האיש נזם זהב בקע משקלו וישם על אפה ושני צמידים על ידיה עשרה זהב משקלם ²³ ויאמר בת מי אתי הגידי נא לי היש בבית אביך מקום לנו ללין ²⁴ ותאמר אליו בת בתואל אנכי בן מלכה אשר ילדה לנחור ²⁵ ותאמר אליו גם תבן גם מספה רב עמנו וגם מקום ללין ²⁶ ויקד האיש וישתחוי ליהוה ²⁷ ויאמר ברוך יהוה אלהי אדני אברהם אשר לא עזב חסדו ואמתו מעם אדני אברהם אנכי בדרך נחני יהוה בית אחי אדני ²⁸ ותרץ הנערה ותגד לבית אמה כדברים האלה ²⁹ ולרבקה אח ושמו לבן וירץ לבן אל האיש החוצה אל העין ³⁰ ויהי כראותו את הנזם ואת הצמדים על ידי אחתו וכשמעו את דברי רבקה אחתו לאמר כה דבר אלי האיש ויבא אל האיש והנה עמד על הגמלים על העין ³¹ ויאמר בא ברוך יהוה למה תעמד בחוץ ואנכי פניתי הבית ומקום לגמלים ³² ויבא האיש הביתה ויפתח הגמלים ויתן תבן ומספה לגמלים ומים לרחץ רגליו ורגלי האנשים אשר אתו ³³ ויושם לפניו לאכל ויאמר לא אכל עד אם דברתי דברי ויאמרו דבר ³⁴ ויאמר עבד אברהם אנכי ³⁵ ויהוה ברך את אדני מאד ויגדל ויתן לו צאן ובקר וכסף וזהב ועבדים ושפחות וגמלים וחמרים ³⁶ ותלד שרה אשת אדני בן לאדני אחרי זקנתו ויתן לו את כל אשר לו ³⁷ וישבעני אדני לאמר לא תקח אשה לבני מבנות הכנעני אשר אנכי ישב בארצו כי ³⁸ אם . אל בית אבי תלך ואל משפחתי ולקחת אשה לבני ³⁹ ואמר אל אדני אולי לא תלך האשה אחרי ⁴⁰ ויאמר אלי יהוה אשר התהלכתי לפניו ישלח מלאכו אתך והצליח דרכך ולקחת אשה לבני ממשפחתי ומבית אבי ⁴¹ אז תנקה מאלתי כי תבוא אל משפחתי ואם לא יתנו לך והיית נקיא מאלתי ⁴² ואבא היום אל העין ואמר יהוה אלהי אדני אברהם אם ישך נא מצליח דרכי אשר אני הלך עליה ⁴³ הנה אנכי נצב על עין המים והיה העלמה היצאת לשאב ואמרתי אליה השקני נא מעט מים מכדך ⁴⁴ ואמרה אלי גם אתה שתה וגם לגמליך אשאב היא האשה אשר הוכיח יהוה לבן אדני ⁴⁵ אני טרם אכלה לדבר אל לבי והנה רבקה יצאת וכדה על שכמה ותרד העין ותשאב ואמר אליה השקני נא מעט מים מכדך ⁴⁶ ותמהר ותורד כדה מעליה ותאמר שתה וגם גמליך אשקה ואשתה וגם הגמלים השקתה ⁴⁷ ואשאל אתה ואמר בת מי אתי ותאמר בת בתואל בן נחור אשר ילדה לו מלכה ואשים הנזם על אפה והצמדים על ידיה ⁴⁸ ואקד ואשתחוה ליהוה ואברך את יהוה אלהי אדני אברהם אשר הנחני בדרך אמת לקחת את בת אחי אדני לבנו ⁴⁹ ועתה אם ישכם עשים חסד ואמת את אדני הגידו לי ואם לא הגידו לי ואפנה אל הימין או אל השמאל ⁵⁰ ויען לבן ובתואל ויאמרו מיהוה יצא הדבר לא נוכל דבר אליך רע . וטוב ⁵¹ הנה רבקה לפניך קח ולך ותהי אשה לבן אדניך כאשר דבר יהוה ⁵² ויהי כאשר שמע עבד אברהם את דבריהם וישתחוי ארצה ליהוה ⁵³ ויוצא העבד כלי כסף וכלי זהב ובגדים ויתן לרבקה ומגדנות נתן לאחיה ולאמה ⁵⁴ ויאכלו וישתו הוא והאנשים אשר עמו וילינו ויקמו בבקר ויאמר שלחוני לאדני ⁵⁵ ויאמרו אחיה ואמה תשב הנערה אתנו ימים או חדש ואחר תלך ⁵⁶ ויאמר אליהם אל תאחרו אתי ויהוה הצליח את דרכי שלחוני ואלכה אל אדני ⁵⁷ ויאמרו נקרא לנערה ונשאל את פיה ⁵⁸ ויקראו לרבקה ויאמרו לה התלכי עם האיש הזה ותאמר אלך ⁵⁹ וישלחו את רבקה אחתם ואת מינקתה ואת עבד אברהם ואת אנשיו ⁶⁰ ויברכו את רבקה ויאמרו לה אחתנו אתי הוי לאלפי רבבה ויירש זרעך את שער איביו ⁶¹ ותקם רבקה ונערתיה ותרכבנה על הגמלים ותלכנה אחרי האיש ויקח העבד את רבקה וילך ⁶² ויצחק בא במדבר באר לחי ראי והוא ישב בארץ הנגב ⁶³ ויצא יצחק לשוח בשדה לפנות ערב וישא עיניו וירא והנה הגמלים באים ⁶⁴ ותשא רבקה את עיניה ותרא את יצחק ותפל מעל הגמל ⁶⁵ ותאמר אל העבד מי האיש הלז ההלך בשדה לקראתנו ויאמר העבד הוא אדני ותקח הצעיף ותתכס ⁶⁶ ויספר העבד ליצחק את כל הדברים אשר עשה ⁶⁷ ויבאה יצחק האהלה שרה אמו ויקח את רבקה ותהי לו לאשה ויאהבה וינחם יצחק אחרי אמו