Genesi 36

¹ ואלה תולדת עשו הוא אדום ² עשו לקח את נשיו מבנות כנען את עדה בת אילון החתי ואת אהליבמה בת ענה בן צבעון החוי ³ ואת מחלת בת ישמעאל אחות נבאות ⁴ ותלד עדה לעשו את אליפז ומחלת ילדה את רעואל ⁵ ואהליבמה ילדה את יעוש ואת יעלם ואת קרח אלה בני עשו אשר ילדו לו בארץ כנען ⁶ ויקח עשו את נשיו ואת בניו ואת בנתיו ואת כל נפשות ביתו ואת מקנהו ואת כל בהמתו ואת כל קנינו אשר רכש בארץ כנען וילך מארץ כנען מפני יעקב אחיו ⁷ כי היה רכושם רב משבת יחדו ולא יכלה ארץ מגריהם לשאת אתם מפני מקניהם ⁸ וישב עשו בהר שעיר עשו הוא אדום ⁹ ואלה תולדת עשו אבי אדום בהר שעיר ¹⁰ ואלה שמות בני עשו אליפז בן עדה אשת עשו רעואל בן מחלת אשת עשו ¹¹ ויהיו בני אליפז תימן ואמר וצפו וגעתם וקנז ¹² ותמנע היתה פילגש לאליפז בן עשו ותלד לאליפז את עמלק אלה בני עדה אשת עשו ¹³ ואלה בני רעואל נחת וזרח שמה ומזה אלה היו בני מחלת אשת עשו ¹⁴ ואלה היו בני אהליבמה בת ענה בן צבעון אשת עשו ותלד לעשו את יעוש ואת יעלם ואת קרח ¹⁵ אלה אלופי בני עשו בני אליפז בכור עשו אלוף תימן אלוף אמר אלוף צפו אלוף קנז ¹⁶ . . אלוף געתם אלוף עמלק אלה אלופי אליפז בארץ אדום אלה בני עדה ¹⁷ ואלה בני רעואל בן עשו אלוף נחת אלוף זרח אלוף שמה אלוף מזה אלה אלופי רעואל בארץ אדום אלה בני מחלת אשת עשו ¹⁸ ואלה בני אהליבמה אשת עשו אלוף יעוש אלוף יעלם אלוף קרח אלה אלופי אהליבמה בת ענה אשת עשו ¹⁹ אלה בני עשו ואלה אלופיהם עשו הוא אדום ²⁰ ואלה בני שעיר החרי ישבי הארץ לוטן ושובל וצבעון וענה ²¹ ודישון ואצר ודישן אלה אלופי החרי בני שעיר בארץ אדום ²² ויהיו בני לוטן חרי והימם ואחות לוטן תמנע ²³ ואלה בני שובל עלון ומנחת ועיבל ושפו ואונם ²⁴ ואלה בני צבעון איה וענה הוא ענה אשר מצא את האימים במדבר ברעתו את החמרים לצבעון אביו ²⁵ ואלה בני ענה דישון ואהליבמה בת ענה ²⁶ ואלה בני דישון חמדן ואשבן יתרן וכרן ²⁷ ואלה בני אצר בלהן וזוען ועקן ²⁸ ואלה בני דישן עוץ וארן ²⁹ אלה אלופי החרי אלוף לוטן אלוף שובל אלוף צבעון אלוף ענה ³⁰ אלוף דישון אלוף אצר אלוף דישן אלה אלופי החרי לאלופיהם בארץ שעיר ³¹ ואלה המלכים אשר מלכו בארץ אדום לפני מלך מלך לבני ישראל ³² וימלך באדום בלע בן בעור ושם עירו דנהבה ³³ וימת בלע וימלך תחתיו יובב בן זרח מבצרה ³⁴ וימת יובב וימלך תחתיו חשם מארץ התימני ³⁵ וימת חשם וימלך תחתיו הדד בן בדד המכה את המדיני בשדה מואב ושם עירו עוית ³⁶ וימת הדד וימלך תחתיו שמלה ממשרקה ³⁷ וימת שמלה וימלך תחתיו שאול מרחבות הנהר ³⁸ וימת שאול וימלך תחתיו בעל חנן בן עכבור ³⁹ וימת בעל חנן . . וימלך תחתיו הדר ושם עירו פעו ושם אשתו מהטבאל בת מטרד בת מי זהב ⁴⁰ ואלה שמות אלופי עשו למשפחותם למקומתם בשמותם אלוף תמנע אלוף עלוה אלוף יתת ⁴¹ אלוף אהליבמה אלוף אלה אלוף פינן ⁴² אלוף קנז אלוף תימן אלוף מבצר ⁴³ אלוף מגדאל אלוף עירם אלה אלופי אדום למשפחתם בארץ אחזתם הוא עשו אבי אדום