Gênesis 46

¹ ויסע ישראל וכל אשר לו ויבא בארה שבע ויזבח זבחים לאלהי אביו יצחק ² ויאמר אלהים לישראל במראת הלילה ויאמר יעקב יעקב ויאמר הנני ³ ויאמר אנכי האל אלהי אביך אל תירא מרדת מצרימה כי לגוי גדול אשימך שם ⁴ אנכי ארד עמך מצרימה ואנכי אעלך גם עלה ויוסף ישית ידו על עיניך ⁵ ויקם יעקב מבאר שבע וישאו בני ישראל את יעקב אביהם ואת טפם ואת נשיהם בעגלות אשר שלח פרעה לשאת אתו ⁶ ויקחו את מקניהם ואת רכושם אשר רכשו בארץ כנען ויבאו מצרימה יעקב וכל זרעו אתו ⁷ בניו ובני בניו אתו בנתיו ובנות בניו וכל זרעו הביא אתו מצרימה ⁸ ואלה שמות בני ישראל הבאים מצרימה יעקב ובניו בכור יעקב ראובן ⁹ ובני ראובן חנוך ופלוא חצרון וכרמי ¹⁰ ובני שמעון ימואל וימין ואהד ויכין וצהר ושאול בן הכנענית ¹¹ ובני לוי גרשון קהת ומררי ¹² ובני יהודה ער ואונן ושלה ופרץ וזרח וימת ער ואונן בארץ כנען ויהיו בני פרץ חצרון וחמואל ¹³ ובני יששכר תולע ופואה ישוב ושמרון ¹⁴ ובני זבולן סרד ואלון ויחלאל ¹⁵ אלה בני לאה אשר ילדה ליעקב בפדן ארם ואת דינה בתו כל נפש בניו ובנתיו שלשים ושלש ¹⁶ ובני גד צפון וחגי ושוני ואצבעון ערי וארודי וארולי ¹⁷ ובני אשר ימנה וישוה וישוי ובריעה ושרח אחתם ובני בריעה חבר ומלכיאל ¹⁸ אלה בני זלפה אשר נתן לבן ללאה בתו ותלד את אלה ליעקב שש עשרה נפש ¹⁹ בני רחל אשת יעקב יוסף ובנימים ²⁰ ויולד ליוסף בארץ מצרים אשר ילדה לו אסנת בת פוטיפרע . כהן אן את מנשה ואת אפרים ²¹ ובני בנימים בלע ובכר ואשבל גרה ונעמן אחים וראש מפים וחפים וארד ²² אלה בני רחל אשר ילדה ליעקב כל נפש ארבע עשרה ²³ ובני דן חשים ²⁴ ובני נפתלי יחצאל וגוני יצר ושלום ²⁵ אלה בני בלהה אשר נתן לבן לרחל בתו ותלד את אלה ליעקב כל נפש שבע ²⁶ כל הנפש הבאה ליעקב מצרימה יצאי ירכו מלבד נשי בני יעקב כל נפש ששים ושש ²⁷ ובני יוסף אשר ילדו לו במצרים נפש שנים כל הנפש לבית יעקב הבאה מצרימה שבעים ²⁸ ואת יהודה שלח לפניו אל יוסף להראות לפניו גשנה ויבא ארץ גשן ²⁹ ויאסר יוסף מרכבתו ויעל לקראת ישראל אביו גשנה וירא אליו ויפל על צוארו ויבך על צוארו עוד ³⁰ ויאמר ישראל אל יוסף אמותה הפעם אחרי ראיתי . פניך כי עודך חי ³¹ ויאמר יוסף אל אחיו ואל בית אביו אעלה ואגידה לפרעה ואמר אליו אחי ובית אבי אשר בארץ כנען באו אלי ³² והאנשים רעי צאן כי אנשי מקנה היו וצאנם ובקרם וכל אשר להם הביאו ³³ והיה כי יקרא לכם פרעה ואמר מה מעשיכם ³⁴ ואמרתם אנשי מקנה היו עבדיך מנערינו ועד עתה גם אנחנו גם אבתינו בעבור תשבו בארץ גשן כי תועבת מצרים כל רעי צאן