Levítico 13

¹ וידבר יהוה אל משה ואל אהרן לאמר ² אדם כי יהיה בעור בשרו שאת או ספחת או בהרת והיה בעור בשרו לנגע צרעת והובא אל אהרן הכהן או אל אחד מבניו הכהנים ³ וראה הכהן את הנגע בעור הבשר ושער בנגע הפך לבן ומראה הנגע עמק מעור בשרו נגע צרעת הוא וראה הכהן וטמא אתו ⁴ ואם בהרת לבנה היא בעור בשרו ועמק אין מראה מן העור ושערה לא הפך לבן והסגיר הכהן את הנגע שבעת ימים ⁵ וראה הכהן ביום השביעי והנה הנגע עמד בעיניו לא פשה הנגע בעור והסגירו הכהן שבעת ימים שנית ⁶ וראה הכהן . ביום השביעי שנית והנה כהה הנגע לא פשה הנגע בעור וטהרו הכהן מספחת היא וכבס בגדיו וטהר ⁷ ואם פשה תפשה המספחת בעור אחרי הראתו אל הכהן לטהרתו ונראה שנית אל הכהן ⁸ וראה הכהן והנה פשתה המספחת בעור וטמאו הכהן צרעת היא ⁹ ונגע צרעת כי תהיה באדם והובא אל הכהן ¹⁰ וראה הכהן והנה שאת לבנה בעור והיא הפכה שער לבן ומחית בשר חי בשאת ¹¹ צרעת נושנת היא בעור בשרו וטמאו הכהן לא יסגרנו כי טמא הוא ¹² ואם פרח תפרח הצרעת בעור וכסתה הצרעת את כל עור הנגע מראשו ועד רגליו לכל מראה עיני הכהן ¹³ וראה הכהן והנה כסתה הצרעת את כל בשרו וטהר את הנגע כלו הפך לבן טהור הוא ¹⁴ וביום הראות בו בשר חי יטמא ¹⁵ וראה הכהן את הבשר החי וטמאו הבשר החי טמא הוא צרעת היא ¹⁶ או כי ישוב הבשר החי ונהפך ללבן ובא אל הכהן ¹⁷ וראה הכהן והנה נהפך הנגע ללבן וטהר הכהן את הנגע טהור הוא ¹⁸ ובשר כי יהיה בו . שחין ונרפא ¹⁹ והיה במקום השחין שאת לבנה או בהרת לבנה אדמדמת ונראה אל הכהן ²⁰ וראה הכהן והנה מראהו שפל מן העור ושערה הפך לבן וטמאו הכהן נגע צרעת היא בשחין פרחה ²¹ ואם יראה הכהן והנה אין בה שער לבן ושפלה איננה מן העור והיא כהה והסגירו הכהן שבעת ימים ²² ואם פשה תפשה בעור וטמא הכהן אתו נגע הוא ²³ ואם תחתיה תעמד הבהרת לא פשתה צרבת השחין היא וטהרו הכהן ²⁴ או בשר כי יהיה בעורו מכות אש והיתה מחית המכוה בהרת לבנה אדמדמת או לבנה ²⁵ וראה אתה הכהן והנה הפך שער לבן בבהרת ומראה עמק מן העור צרעת היא במכוה פרחה וטמא אתו הכהן נגע צרעת היא ²⁶ ואם יראה הכהן והנה אין בבהרת שער לבן ושפלה איננה מן העור והיא כהה והסגירו הכהן שבעת ימים ²⁷ וראה הכהן ביום השביעי אם פשה תפשה בעור וטמא אתו הכהן נגע צרעת היא ²⁸ ואם תחתיה תעמד הבהרת לא פשתה בעור והיא כהה שאת המכוה היא וטהרו הכהן כי צרבת המכוה היא ²⁹ ואיש או אשה כי יהיה בו נגע בראש או בזקן ³⁰ וראה הכהן את הנגע והנה מראהו עמק מן העור ובו שער צהב דק וטמא הכהן אתו נתק הוא צרעת הראש או הזקן היא ³¹ וכי יראה הכהן את נגע הנתק והנה אין מראהו עמק מן העור ושער שחר אין בו והסגיר הכהן את נגע הנתק שבעת ימים ³² וראה הכהן את הנתק ביום השביעי והנה לא פשה הנתק ולא היה בו שער צהב ומראה הנתק אין עמק מן העור ³³ והתגלח ואת הנתק לא יגלח והסגיר הכהן את הנתק שבעת ימים שנית ³⁴ וראה הכהן את הנתק ביום השביעי והנה לא פשה הנתק בעור ומראהו איננו עמק מן העור וטהרו . הכהן וכבס בגדיו וטהר ³⁵ ואם פשה יפשה הנתק בעור אחרי טהרתו ³⁶ וראה הכהן והנה פשה הנתק בעור לא יבקר הכהן לשער הצהב טמא הוא ³⁷ ואם בעיניו עמד הנתק ושער שחר צמח בו נרפא הנתק טהור הוא וטהרו הכהן ³⁸ ואיש או אשה כי יהיה בעור בשרם בהרת בהרת לבנות ³⁹ וראה הכהן והנה בעור בשרם בהרת כהות לבנות בהק הוא פרח בעור טהור הוא ⁴⁰ ואיש כי ימרט ראשו קרח הוא טהור הוא ⁴¹ ואם מפאת פניו ימרט ראשו גבח הוא טהור הוא ⁴² וכי יהיה בקרחתו או בגבחתו נגע לבן אדמדם צרעת פרחת היא בקרחתו או בגבחתו ⁴³ וראה אתה הכהן והנה שאת הנגע לבנה אדמדמת בקרחתו או בגבחתו כמראה צרעת עור בשר ⁴⁴ איש צרוע הוא טמא הוא טמא יטמאנו הכהן בראשו נגעו ⁴⁵ והצרוע אשר בו הנגע בגדיו יהיו פרומים וראשו יהיה פרוע ועל שפם יעטא וטמא טמא יקרא ⁴⁶ כל ימי אשר הנגע בו יטמא טמא הוא בדד ישב מחוץ למחנה מושבו ⁴⁷ והבגד כי יהיה בו נגע צרעת בבגד צמר או בבגד פשתים ⁴⁸ או בשתי או בערב לפשתים ולצמר או בעור או בכל מלאכת עור ⁴⁹ והיה הנגע ירקרק או אדמדם בבגד או בעור או בשתי או בערב או בכל כלי עור נגע צרעת הוא והראה את הכהן ⁵⁰ וראה הכהן את הנגע והסגיר את הנגע שבעת ימים ⁵¹ וראה את הנגע ביום השביעי כי פשה הנגע בבגד או בשתי או בערב או בעור לכל אשר יעשה העור למלאכה צרעת ממראת הנגע טמא הוא ⁵² ושרף את הבגד או את השתי או את הערב בצמר או בפשתים או את כל כלי העור אשר יהיה בו הנגע כי צרעת ממראת היא באש תשרף ⁵³ ואם יראה הכהן והנה לא פשה הנגע בבגד או בשתי או בערב או בכל כלי עור ⁵⁴ וצוה הכהן וכבסו את אשר בו הנגע והסגירו שבעת ימים שנית ⁵⁵ וראה הכהן אחרי הכבס את הנגע והנה לא הפך הנגע את עיניו והנגע לא פשה טמא הוא באש תשרפנו פחתת היא בקרחתו או בגבחתו ⁵⁶ ואם ראה הכהן והנה כהה הנגע אחרי הכבסו אתו וקרעו אתו מן הבגד או מן העור או מן השתי או מן הערב ⁵⁷ ואם תראה עוד בבגד או בשתי או בערב או בכל כלי עור פרחת היא באש תשרפנו את אשר בו הנגע ⁵⁸ והבגד או השתי או הערב או כל כלי העור אשר תכבס וסר מהם הנגע וכבס שנית וטהר ⁵⁹ זאת תורת נגע הצרעת בגד הצמר או הפשתים או השתי או הערב או כל כלי העור לטהרו או לטמאו